Shillong, Nailar 29 : U Chairman ka Regional Committee ka West Jaintia Hills bad Symbud Myntri Rangbah Bah Sniawbhalang Dhar ha ka sngi Ba-ar, ula ong ba ka shnong Lapangap kam hap satia hapoh ka jaka iakajia pud bad ka Assam.
“Kam don satia kano kano ka jingiakajia pud ha shnong Lapangap” ong u Bah Sniawbha haba iakren bad ki nongthoh khubor halor ki jingjia iakajia hapdeng ki paid Khasi-Pnar bad ki Karbi ha kane ka shnong.
Ula pyntip ba ka Sorkar Jylla kala dep ban buh palat ia 2 platoon ki Pulit bad ia ka jinglong jingman mynta la lah ban tehlakam.
Haba kylli la kan don ka jingle eiei pyrshah ia ka jingkynnoh kyntur pud jong ka Assam ha Lapangap, u Bah Sniawbha ula ong “Ka Committee kan sa shong bishar bha ba ha kano ka rukom ka Assam ka kyntur pud”.
Kat kum ka jingong jong u, kane ka jingjia kaba la jia ka jingiakynad ka dei kaba jngai bha na ka shnong Lapangap.
Ula ong ba ki Regional Committee bala thung da ka Sorkar Meghalaya bad Assam kin sa wanrah ia ki jingai jingmut kiba pdiang na baroh arliang ban iapynbeit noh ia ki jingiakajia.
U Bah Sniawbha u pyntip ba ki Regional Committee na baroh artylli ki Jylla, dang shen kila pynlong ia ka jingialeit jurip lang ia ki jaka kiba don hapdeng ka jingiakajia.
“Lada donkam, ngin sa leit biang ban iajurip lang” ula ong. Ula bynrap ba ki Regional Committee na baroh arliang kin sa aiti noh shen ia ka kaiphod ba khatduh shala ki jong ki Myntri Rangbah, ki ban sa shimpat ia ka rai ba khadduh ia kane ka kam.
Halor ka jingdawa ka HYC ban ai tiar siat ia ki paidbah kiba sah ha Khappud, u Bah Sniawbha ula ong “Ki dei kiei (HYC)?. Ki long laitluid ban kren kat kaba ki mon hynrei ka Sorkar kan leh ia kaei kaba bha tam na ka bynta ki paidbah. Ai ba kin ong kat kaba ki kwah hynrei ngin leh ia kaei kaba dei eh”.
Haba kynthoh halor ka jingbyrngem ka Karbi Students Association (KSA) ban wanrah ia ka jinglong jingman kumba jia ha Manipur lada ki paidbah ki rai ban leit sha Meghalaya, u Symbud Myntri Rangbah ula ong “Mano mano ruh ki lah ban kren kat kaba ki kwah. Ka don ka jinglaitluid ban kren hynrei ka Sorkar kan leh ia kaei kaba bha tam na ka bynta ki paidbah”.
Ha kajuh ka por, u Symbud Myntri Rangbah ula kyntu ia ki Sengbhalang kiba leit jurip ia ki shnong khappud ba kin ym pynmih ia kano kano ka jingkulmar kaba lah ban lam sha ka jingthut ka shongsuk shongsain.
