Itanagar, Naitung 15: Hadien ba ki bor sorkar ka Itanagar Capital Region (ICR) ki la pynmih ia ka hukum ban weng ia ki signboard ki ba thoh ia ka kyntien ‘doh Masi’ ne beef na ki hotel bad restaurant hapoh ka district, ka la mih ka jingkynthoh ka ba jur lyngba ki social media da ki trai shnong ki ba la kam ba kane ka dei ka sienjam ka ba nyngkong ka ban lam sha ka jingkhang bam doh masi ha ka jylla.
Hynnin ka sngi Palei hadien ba kane ka hukum ban weng ia ka kyntien ‘beef’ na ki signboard ka la mih paw, ki nong pyndonkam social media ki la pynpaw lyngba ka Facebook bad Twitter da ka ba kam ba kane ka dei ka sienjam ka ba nyngkong ban test ne pyrshang ia ka jingsngew jong ki nongshong shnong halor kane ka phang.
Katto katne na ki nong pyndonkam Facebook ki la ong ba kane ka dang dei ka sienjam ka ba nyngkong, bad hadien kan mih sa ka hukum ka ban khang pyrshah ia ka doh masi ha ka jylla.
Ha ba kren halor kane ka phang, u Pajang Aboh, u nongshong shnong ka thain Naharlagun u la ong, “Kane ka dei tang ka jingsdang.Lada mynta kam mih kano kano ka jingpyrshah, kan long ka ba shem shitom na ka bynta ki nongshong shnong ki bym dei ki Hindu wat ba kin ioh im.Donkam ban pyrshah mardor ia kane la ka long ha kano kano ka rukom.”
Kumjuh u Tasso Chobin Tada uwei pat u trai shnong u la ong ba kane ka hukum ka dei tang ka jingpyrshang ban peit ia ka jingpynpaw jong ki paidbah hapoh ka thain. “Ka sienjam ka ba bud la thikna ka long ban khang bam doh masi,” u la ong shuh shuh.
Katto katne ki briew ki la pynpaw ka jingpyrshah da ka ba ong ba kin ym lah ban pdiang ia kane hapoh Arunachal bad kito ki ba sngew don jingeh bad ka Arunachal ki dei ban mih noh na kane ka jylla.
Lah ban kdew ba ia kane ka hukum la pynmih da ka Executive Magistrate jong ka Naharlagun SubDivision ha Capital Complex hapoh ki kyndon 144 CrPC on July 14, 2022.
Kane ka hukum ka ong, “Ka la don ka jingpyntip sha ki bor ba dei khmih ba ki don shibun bah ki hotel bad ki restaurant ki ba hap hapoh Naharlagun sub-division ki ba wah ia ki signborad ki ba thoh ia ka kyntien ‘doh Masi.’
Ki bor ka district ka ICR ki ngeit ba ha ka ri ka ba burom ia baroh ki jait niam katkum ki riti synshar khadar jong ka ri, ka jingwah ia ki jingthoh ki ba kum kine ha ki hotel bad ki restaurant ka lah ban ktah ia ka jingsngew jong ki katto katne ki kynhun nongshong shnong bad ka lah ruh ban wanrah ka jingiapher jingmut hapdeng ki kynhun nongshong shnong bapher bapher, ong katei ka hukum.
