Shillong, Naitung 15: Hadien u MLA bad ki Dorbar Shong, mynta sa ka seng Fedetation of Khasi Jaintia & Garo People (FKJGP) Mawprem Circle, kala mih ban pyrshah jur ia ka jingthmu jongka Sorkar Jylla ban rah ia ka Them Metor sha Them Mawbah, Upper Mawprem.
“Ka FKJGP Mawprem Circle ka pyrshah jur ia ka Sorkar ban wanrah ia ki Harijan ha TB Hospital, Upper Mawprem. Kane ka thain ka la jyllei lypa da ki khyllah jaid bad wat haduh kine ki sngi, la bun palat ki jingsniew ki bym lah shu ban niew namar ba ka dei ka jaka kaba iashongkhleh Jaidbynriew” ong u Bah Reginald Thabah, President ka FKJGP Mawprem.
Kat kum ka jingong jong u, kane ka thain ka dei kaba la bun da ki khyllah jaid ban ia ki Trai Shnong bad ka jingpyrshang jong ka Sorkar bad thmu ban wanrah shuh shuh sa ia ki Harijan kiba la dei lypa ki briew kiba la iatyngkhuh jingeh shibun bad ki Khasi.
Une u Nongialam ka FKJGP ula ong ba kane kan wanrah bad pynlong ia ka jingkharoi ki jingsniew bad ka jingpyn khapngiah ia ka shnong ka thaw.
“Lada ka Sorkar ka thmu ban wanrah ia kine ki mynder, ka FKJGP Mawprem Circle kan ieng pyneh bad kan ialeh ban nym ailad da lei lei ruh” ula ong.
Lada ka Sorkar ka thmu ne leh donbor ia kaei kaba ki nongshongshnong bad ki shnong kiba marjan kim sngewtynnad, ka seng kam banse ban iakhun bad ialeh wat lada dei ban pan jingkyrshan na u paidbah” ula bynrap.
U Bah Reginald ula ong ba lada ka Sorkar ka bakla ban shim rai ia kane ka kam, ka Seng kan ym kynran dien bad ka Sorkar kan hap ban bah ia ka jingkitkhlieh lada jia ba mih ka jingiaumsnam.
