Shillong, Nailar 23 : Ka Khasi Students Union (KSU) kala pan jingshai na ka Directorate of Health Services (DHS) halor ka jingkynnoh ba 11 ngut na ki 14 ngut kiba ioh ia ka bhah pule doktor(MBBS) lyngba ka Open Category jong ka State Quota, ki dei ki briew ba nabar ka Jylla Meghalaya.
U General Secretary ka KSU samla Donald Thabah ula pyntip ba ka KSU kala ioh pdiang ia ka jingujor ba kine ki 11 ngut kiba ioh leit pule MBBS na ka bhah ka Meghalaya la kynnoh ba kim dei satia ki nong Meghalaya hynrei ki dei kiba na Assam.
“Na ki 14 ngut kiba shah jied ban leh screening, don tang lai ngut ki trai ri lane ki riewlum katba 11 ngut pat ki dei na kiwei pat ki Jaidbynriew ki bym dei ki riewlum” ong u samla Donald Thabah, General Secretary ka KSU ha ka kyrwoh.
Une u Nongialam ka KSU ula pynpaw ruh ia ka jingsuba ba kine ki briew ki dei kiba ioh ia ki kot ki sla na ka Shnong Ampati, South West Garo Hills.
“Ka KSU ka pan jingpynshai na ka Sorkar Jylla hato kitei ki dei kiba shisha ne kumno” ula ong haba dawa ruh ba ka Sorkar ka dei ban pyni paidbah ia ki Aadhar Card bad EPIC jong kitei ki 11 ngut ban pynthikna ba ki dei ki nong Meghalaya bad kumjuh ruh ban pyni na ki kolej aiu ba ki pyndep ia ki jingpule.
Kat kum ka jingong ka KSU, ka Open Category ka dei ka bynta ba baroh ki nong Meghalaya kynthup ki Scheduled Tribe ka Jylla ki lah ban iakhun bad bunsien, bun ngut ki Khasi ki ju ioh ban rung ha kane ka thup kaba plie lad plie lynti pat ia kiwei ki para Khasi ban rung ha ka Khasi-Jaintia category.
Ula ong ba ka jingioh rung khlieh da ki samla pule ba suba dei na shabar ka Jylla kan pynduh lad ia ki 11 ngut kiwei pat ki samla Khasi bad Garo kiba thrang ban ioh leit pule MBBS.
Pule ruh: Plie u CM ia ka kor MRI ha Nazareth Hospital
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
 kala pan jingshai na ka Directorate of Health Services (DHS) halor ka jingkynnoh ba 11 ngut na ki 14 ngut kiba ioh ia ka bhah pule doktor(MBBS) lyngba ka Open Category jong ka State Quota, ki dei ki briew ba nabar ka Jylla Meghalaya.){kind=link}