Shillong, Nailar 23 : U Myntri Rangbah ka Jylla Conrad K Sangma, ha ka sngi Balang ula kyntu ia ka Voice of the People Party (VPP) ba kan da leh ‘Homework’ bha ne wad bniah bha, halor ka jingkynnoh ba pyndonkam bakla ha ka jingaiwai ia ki katto katne ki bynta jong ka jingtei ka Meghalaya House ha Kolkata.
U Conrad ula pyntip ba ka kram kaba la aiwai ka dei kaba shu ieh khlem pyndonkam da ki snem bad namar kata, ka Sorkar kala pynthikna ba kan khot da ka tender ban aiwai bad u nongthong uba hehduh ula ioh shim wai.
Ka Voice of the People Party (VPP) kala kynnoh ba ka Sorkar kala aiwai ia kane ka kamra sha u Bah Rocky Dhar uba dei u para trai jong u Symbud Myntri Rangbah ka Jylla Bah Sniawbhalang Dhar.
“Nga kyntu iano iano ruh ba kin da leh homework bha ia kaei kaei kaba ki kren” ong u Myntri Rangbah haba pyntip ‘La jan 15 snem, kane ka kamra hadien bala dep tei, kala shu sah thylli khlem pyndonkam. Phi kren ia ka jingduhnong ka Sorkar Jylla da ki klur tyngka ka khajna hynrei ban aiwai ia ka kamra ba shu ieh ban ioh khajna pat kam long”.
“Kane ka Nongkynti ka dei kaba biang bha bad ka la dei ban khot tender la slem bha. Ngi dang leh ia kane ha usnem 2019, ngi la iakren ia kane ka kam bad ngi la rai ba ngin pyniaid shakhmat bad ka jingaiwai” bynrap u CM.
U Myntri Rangbah ula pyntip “Nga la leit jngoh la bunsien ia kane ka hall kaba shu sah thylli. Nga la iohi ia ka Tourism counter kaba don hangtei, ka Agriculture counter hynrei kim da don bun eh ki kam ba ki leh. Nalor kata, kane ka dei ka jaka pdeng jong ka Kolkata bad kumta, ka jingpynmih khajna baroh lang kaba ngi la duh ka long kaba bun”.
U Myntri Rangbah ula ong ba dei halor kinekiei kiei ba ka Sorkar kala khot tender ban aiwai ia kane ka kamra.
“Kino kino kiba thong bun, ia kita ngi la rai ban aiwai bad ha ka jingpyniaid ia ka kam, u nongthong bun ula ioh. Jia ryngkhat ba une u Nongthong bun u dei u dei u briew ia uba ngam lah ban kynthoh eiei” bynrap u Myntri Rangbah.
Pule ruh: Kitbok ka skul Saiden SS ia ka Kynhun U-17 ban mihkhmat sha ka National Level Subroto Cup 2023
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
