Shillong, Nailar 18: Ka Khasi Student Union (KSU) Employment & Monitoring Cell bad NEHU Unit hynne ka sngi kila leit ban buh daka dorkhas ha u vice chancellor (VC) ka skulbah North Eastern Hills University (NEHU) u P. S Shukla ban kyntu baka jingpyntreikam iaka National Education Policy (NEP) 2020 kam dei ban ktah iaki samla pule, iaki nonghikai bad iaki college hapoh ka jylla baroh kawei.
Haba kren sha ki lad pathai khubor u chairman ka KSU Employment & Monitoring Cell u samla Ruben Naijar ula ong ba watla ka NEHU kala iai pynpaw ban iaid shakhmat iaka jingpyntreikam iaka NEP hynrei kumba la paw mynta ki don shibun ki jyrwit jyrwat khamtam haba iadei bad ki syllabus.
U sama Ruben ula iathuh ba naka liang u VC ula pyntip ba ula lum shibun ki jingialang hapdeng ki Principal jong ki College bad ki bor sorkar ban ia phylliew jingmut halor ki jingeh ba ki College ki sngew ba ki iakynduh ban pyntreikam iaka NEP naduh mynta u snem.
“Ka NEP ka dang don ki jyrwit jyrwat hangne hangtai kum ki syllabus kim pat biang bad ki materials naka bynta ki khynnah ruh kim pat biang. Ki Guidelines jong ka skulbah kim pat shai bad la paw ruh ba ki nonghikai ruh ki pyrshah iaka jingthmu ban pyntreikam noh iaka NEP naduh mynta u bnai” la ong u samla Ruben.
U samla Ruben ula ong ba naka liang ka KSU ka dawa na u VC ba udei ban pynshai ia kine ki jyrwit jyrwat jong ka NEP hapdeng ki nonghikai bad ki Principal jong ki College bapher bapher namar kumba ka paw mynta, ki don ki College kiba pyntreikam iaka NEP hynrei ko nonghikai pat kim treh ban shim iaki Class.
“Ka seng ka dawa hi ba ki samla pule kim dei ban duh nong lada pyntreikam iaka NEP bad ka long kaba sngewtynnad ba u VC ula kular ba u kloi ban iakren bad kino kino kiba pyrshah iaka jingpyntreikam iaka NEP” ula ong.
Pule lang ia kane: Ki nongshong shnong kidei ban mih paidbah ban pynsngew ha ka jingwan jurip ka Regional Committee ba ki kwah ban neh beit ha Meghalaya: PN Syiem
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
