Shillong Nailar 18: Ka Boundary Committee jong ka Khasi Hills Autonomous District Council haka sngi Thohdieng kala lum ia ka jingialang bad ki khlieh nongsynshar bad ki nongialam shnong ha ki thain khappud kiba don hapdeng ka jigiakajia pud bad ka jylla Assam bad kidei ban mih paidbah ban pynsngew iaka sur ka jongki hakhmat jong ka Regional Committee ka sorkar Assam bad Sorkar Meghalaya ban neh beit ha Meghalaya ha ka jingiapynbeit pud hapdeng kine ki ar tylli ki jylla.
U Chairman jong ka Boundary Committee ka KHADC u Bah Pynshngain N Syiem uba long ruh u Deputy CEM ka KHADC ula iathuh ba ha kane ka jingialang la wan ban iahsimbynta da ki MDC kiba dei ki dkhot jong ka Committeee, ki Syiem, ki Sordar, ki Nongialam Shnong bad ki nongshong shnong ha ki 5 tylli ki thain khappud kiba don jingiakajia bad ka jylla Assam.
“Ki paidbah kiba shong ha kine ki jaka kidei ban ia mih paidbah haba wan jurip ka Regional Committee jong ka Meghalaya bad Assam ban pynpaw iaka sur ka jongki bad iaka jingkwah ka jongu paidbah ban don beit hapoh ka jylla Meghalaya” ong u Bah PN Syiem haba iakren bad ki nongthoh khubor.
Ula ong, ba ki Shnong, ki Raid bad ki Hima ki wan ban ai lang ia ki kot jaka puta sha ka Council hadien ba kila dep ban aiti sha ka Regional Committee jong ka sorkar jylla khnang ba ka Council kan ioh ban buddien bad ban iakren ha ka jingialang jong ka Regional Committee.
U Bah PN Syiem ula ong ba ki kot ki sla kiba ka Council kala iohpdiang la kdew shai ha ki kot ki sla naduh ki snem 1900 tam la shem ba kiba bun ki jaka ki hap hapoh ka jylla Meghalaya bad kane kan iarap shibun ban pynshisha iaka jingdon ia u pud u sam bad ia ka histori lyngba ki kot ki sla.
“Kiba la wan iashimbynta ki kynthup na ki 5 tylli ki thain kiba don hapdeng ka jingiakajia pud bad ka Assam kiba kynthup ia ka thaiñ Desh Domreah kaba hap ha Hima Mylliem, ka Borduar kaba hap haka Hima Nongspung bad Hima Nongkhlaw, ka Nongwah Mawtamur kaba hap ha Hima Sohiong bad Hima Jirang, ka Langpih kaba hap ha ka Hima Nongmynsaw, ka Block II kaba hap haka Raid Nongtung, Hima Khyrim” ong u Bah PN Syiem.
Ha kaba iadei bad ka thain Langpih, halor ka jingkwah jong ki katto katne tylli ki shnong ban hap noh sha ka jylla Meghalaya, na ka liang u Chairman jong ka Boundary Committee ula ong, ba ia kane ka bynta la pynkhamti ha ki nongmihkhmat ha Hima Nongmynsaw kiba na katei ka thaiñ ba kin pyrshang katba lah ban pynsngewthuh ia ki ban neh beit hapoh ka jylla Meghalaya bad kumba long mynta kila duna bha ki shnong kiba kwah ban hap noh ha ka jylla Assam.
