Shillong, Nailar 17: Ka Voice of the People Party (VPP) hynne ka sngi Palei, kala buh jingkylli iaka rai jong ka tnat General Administration Department (GAD) halor ka jingkynnoh ba ka ai jaka iaka Ground Floor jong ka Meghalaya House ha Kolkata sha u para jong uwei u Myntri Sorkar ban pyniaid iaki kam shimet.
Ka kyrwoh na u General Secretary ka VPP Dr. Ricky AJ Syngkon ka ong “Ka VPP ka sngew kyndit ban sngewbynniaw ban ioh jingtip iaka rai jong ka tnat GAD (A) ka sorkar Meghalaya ban ai jaka daka Ground Floor hapoh ka Meghalaya House kaba don ha Russell Street, Kolkatta sha uwei M/S Rocky Dhar, Nongmynsong, Umkdait Block –III, Shillong -793019 naka bynta ki kam khaii jong u”.
Lah ban kdew ba u Rocky udei u para jong u Symbud Myntri Rangbah ka jylla bah Sniawbhalang Dhar.
U Dr. Ricky ula ong ba ka long kaei kaei kaba sngewkyndit ban tip ba ha kane ka Ground Floor jong ka Meghalaya House ha Kolkata la pyndonkam da 3 tylli ki tnat treikam /Corporations jong ka sorkar kata ka Tourist Information Centre hapoh ka Directorate of Tourism, Directorate of Horticulture bad ka Meghalaya Handloom and Handicrafts Development Corporation Ltd– Government State Emporium.
Ula ong ba ia kine baroh 3 tylli ki Units/Outlets la pyntreikam hapoh kane ka jaka naka bynta ban kyntiew iaki mar mata bad kumjuh ruh ban pyninam iaki mar kiba la wanrah napoh Meghalaya.
“Namar kane, ngim lah ban sngewthuh ha kano ka rukom ka sorkar jylla kaba don iaka kamram ban shakri iaki paidbah lyngba ki tnat treikam bapher bapher mynta ka pyrshang ban shakri tang ia uwei u riew shimet daka ba pynduhnoh iaki paidbah” la kynnoh u Dr. Ricky .
