Shillong Nailar 14: Ka jylla Meghalaya kala pynkhreh ban pynlong ia ki tamasa bapher bapher kiban sdang naduh ka 12 tarik u Risaw da ka jingthmu ban ialeh ban kyntiew iaka kam jngohkai ha ka jylla baroh kawei.
Haba pynbna ia kane, hynne ka sngi Nyngkong da u Myntri ka tnad Jngohkai u Bah Paul Lyngdoh ula ong “Ki tamasa bapher bapher yn sa pynlong ha kylleng ki bynta jong ka jylla ban rah shajrong ia ka dur ka dar jong ka jylla Meghalaya kum kata ka jaka kaba biang tam hapoh ka ri na ka bynta ki nongjngohkai pyrthei”.
Yn sdang ia kane ka tamasa da kaba pynlong iaka Megha Kayak Fest kaba lai sngi haka 12 haduh 14 tarik u Risaw ha Shnong Umtham, Ri Bhoi District hadien kane yn pynlong ia ka Shillong Literary Festival kaba lai sngi ha nongbah Shillong naduh ka 14 haduh 16 tarik u Naiwieng.
U Bah Paul Lyngdoh ula ong ba iaka Shillong Cherry Blossom Festival, kaba dei ka tamasa kaba khring bha ia ki paidbah ha ki snem ba la dep, yn pynlong ha ka 17 haduh 19 tarik u Naiwieng bad mynta ka kynti ia kane ka tamasa yn pynlong ha Ri Bhoi district.
Ha u snem ba la dep, ia katei ka tamasa la la hap ban pynsangeh noh namar ka jingdon ka jingjia ha ka shnong Mukroh ha kaba 6 ngutki briew kila shah siat iap ha kaba 5 ngut kidei na Meghalaya bad uwei u Forest Guard ka Assam.
Namar ka jingpynsangeh noh ia katei ka tamasa, u Nongpyniaid ia katei ka tamasa u Bah Jason Manner ula iathuh ba kila dep ban die ia ki 12000 tylli ki tiket ha ka shi sngi bad la khmih lynti ba kin don haduh palat 60,000 ngut ki briew kiban wan sha ka jylla.
“Ngi la dep ban pynphai biang iaka pisa kaba kot T.1.25 Klur sha ki paidbah kiba la thied ia ki tiket bad ngi la lah ban pyndep lut ia kane ha u bnai Kyllalyngkot mynta u snem bad ka jingduhnong ki nongpyniaid ia katei ka tamasa kala kot sha ka T.3.6 Klur namar ka jingpynsangeh noh ia ka tamasa” ong u Bah Jason.
“Mynta u snem, ngi buhthong ba kin don haduh 90,000 ngut ki briew kiban wan sha ka Cherry Blossom Festival” ula ong.
Halor ka jingkylli ba bun ki kynthoh jur ban pynlong ia ki tamasa, u Myntri Sorkar ula ong, ba ki nongkynthoh kin don beit ha man la ki jaka hynrei ia ka jylla Meghalaya la tip ruh kum ka Music Capital jong ka ri.
“Ha ka jingshisha, bun ki nongtem nongrwai ki shem jingeh ban kamai jakpoh namar ka jingduna palat ki lad, mynta ngi la ai ia katei ka rynsan jong ka jingailad bad jingmyntoi bad kane kan ym leit tang sha ki kynhun kiba pynlong ia ka tamasa ne ki nongrwai ne nongtem kiba iashimbynta ha katei ka rynsan hynrei kin don ruh bun kiban ioh jingmyntoi lyngba kitei ki tamasa” ong u Bah Paul.
“Kumta kan don beit ka jaka na ka bynta ban pynbha shuh shuh bad ka don ruh ka jingduna ha kaba iadei bad ka jingdawa bad ka jingpynbiang bad kane kadei ka jaka kaba ngi ialeh ban pynbha, ngi ialeh ban iai pule bad ngin sa lah ban kyntiew ha kaban pynbiang ia ki jingdonkam kiba ngi lah don lypa” ula ong.
“Ngi don ruh ia ki surok kiba long shi bynta jong ka projek kaba iadonbynta bad ka kam jngohkai hynrei kine kidei thik tang ki surok kiba pyniasoh ne kiba don iaka lad ban bynrap ban kyntiew ia ka kam jngohkai” ong u Bah Paul bad ka bynrap ba ym treh ban kren eiei pat ha kaba iadei bad ka rukom treikam jong ka tnad PWD (Roads) halor ka jingdon jongki surok kiba sniew.
U Myntri Sorkar ula pyntip ruh ba ha kaba sdang jong u snem ban wan, kin don ki prokram kiba man la ka por ha Soso Tham Auditorium bad ha Lariti ne ia kaba mynshwa la tip kum ka SICPAC.
“Namar ba kala don ka jingdawa na ki briew kiba wankai, ngin sa pynlong ia ki prokram kiba man la ka por ha Soso Tham Auditorium ia kaba yn pynlong da ka tnad Arts and Culture ryngkat ka jingkyrshan jong ka tnad jngohkai bad ka baar, ngi don ia ka Lariti ia kaba nga la leit ban jurip ha ka taiew kaba la dep bad mynta ngi lah long kiba la pynkhreh ban plie noh bad ban sdang iaka jingshakri bad ban pyndonkam noh ia ki 3 tylli ki Theatre bad ha u snem ban wan ngin sa pynlong ia ki prokram bapher bapher” la ong u Myntri Sorkar.
Sa kiwei pat ki tamasa kiban sa pynlong ki kynthup ia ka Me.Gong Festival, ka Winter Tales Festival bad ia ki tarik na ka bynta kine ki festival yn sa pynbna kham hadien.
