Nongpoh, Nailar 14: U Myntri Rangbah ka jylla u Conrad Kongkal Sangma hynne ka Sngi Nyngkong, u la plie ia ka jaka ban ai jinghikai bapher bapher ba la tip kum ka Prime Hub bad ruh ia ka Processing Unit ban saiñ ia u sohtrun, kiba la dep ban tei ha ka shnong Umdihar, Ri Bhoi District.
Kane kadei ka sngi kaban sah jingkynmaw na ka bynta ki paid nongrep ka them Ri Bhoi District bad ruh ia ka kynhun Integrated Village Cooperative Society (IVCS) kaba kdup ia shibun tylli ki kynhun hapoh jong ka lyngba ka jingplie ia katei ka Prime Hub bad iaka Processing Unit.
Inaugurated the PRIME Hub at Umdihar village, Ri Bhoi District.
Great to see Umdihar IVCS receiving the technical support from partners from Bangalore to explore pineapple processing in their Pineapple Processing Unit which is in the same vicinity of the Prime Hub. Pineapple… pic.twitter.com/TDTuzNvVZY
— Conrad K Sangma (@SangmaConrad) August 14, 2023
Ha kane ka sngi plie, la ia donlang u MLA ka Umsning Constituency u Dr. Celestine Lyngdoh, ka MDC ka Umsning ka Kong Magdalyne Sawkmie Mawlong, u Deputy Commissioner ka Ri Bhoi u Arpit Uphadhaya, u Giri Prasad u SP ka Ri Bhoi District, ka Kong Mary June Shylla, Secretary ka IVCS, ki riew pawkhmat bad ki nongkitkam jong ka IVCS, ki nongshong shnong bad kiwei kiwei.
Haba kren ha ka jingialang u Myntri Rnagbah ka jylla u Conrad K Sangma, u la maitphang halor ka jingmyntoi ba ki paid nongrep bad ki kynhun treikam lajong hapoh ka Ri Bhoi District ki lah ban ioh lyngba ka Prime Hub bad ka Processing Unit kaba dei hi ka jingthmu jong ka sorkar jylla ban pynmih ia ki lad ki lynti ban kyntiew ia ka ioh ka kot jong ki nongrep bad kiba sengkam lajong.
U Conrad ula ong, ba ka Prime Hub kam dei tang ban kyntiew ia ki kam ki jam, hynrei kan dei ruh ka lad ban pynkhlaiñ ia ki kynhun bapher bapher ba kin nang kiew na ka por sha ka por ban ia ki snem kiba la leit noh bad lyngba ki jinghikai ban pynkhlain ia kino kino ki kam ha ki kyrdan bapher bapher.
Ula ong, lyngba kane ka rynsan yn lah ruh ban ai ia ki jait jinghikai, ka jingiarap pisa, ban btin lynti kumno ban pyniaid iew ia ki mar ki mata ne ki jingmih na ka rep ka riang.
Ha kaba ia dei pat bad ka Processing Unit, u Conrad ula ong, ba kane ka long shisha ka jingmyntoi kiba khraw na ka bynta ki nongrep sohtrun, ha kaba mynta kin lait na ki jingeh ba ki ju mad baroh shi katta khamtam ha kaba iadei bad ka jaka sumar ia ki soh ban lait na ka jingpyut, hynrei mynta yn lah ruh ban saiñ ia shibun ki jingpynmih na u sohtrun kum ka umsoh, ka jam bad kiwei kiwei kiban kyntiew shisha ia ka ioh ka kot jong ki nongrep.
U Mynti Rangbah ula ong “Namar ka shnong Umdihar ka dei ka shnong pdeng hapoh Ri Bhoi District bad kaba don ruh harud ka surokbah NH-6 kaba jan ruh sha ki ñew ki hat la kadei sha Nongpoh, Byrnihat ne sha Umsning bad sor Shillong, kumta kine ki lad jingiarap kiba la plie ha kane ka shnong, kan long shisha ka jingkyrkhu kaba khraw ia ki nongrep bad ki kynhun IVCS kiban treikam lyngba kane ka jaka”.
