Shillong, Nailar 13: Ki dkhot jong ka kynhun kieng atiar ka Hynniewtrep National Liberation Council (HNLC) ha ka sngi Saitjaiñ kila leit buh syntiew lum jingtep ha Lawmali ban kynmaw burom ia u General Secretary barim jongka u Bah Cheristerfield Thangkhiew ha ka lyngkhuh sngi ba iap ka baar.
Ki bahaiing bahasem jong u Bah Cheristerfield kial liet ban buh syntiew ha kate iaka sngi ban kynmaw burom iala u baieid bathoiñ uba la khlad noh ar snem mynshwa na ka jingshah siat iap ha ki pulit ka jylla.
Lah ban ong, ba kane kadei ka sien kaba nyngkong ba ki dkhot ka HNLC kila iohlad ban leit buh syntiew iala u nongialam barim namar ba ki don hapoh jong ka jylla ban iakren iasuk bad ka sorkar jylla bad sorkar pdeng.
Ha kane ka jingleit buh syntiew, ka seng kala aiti iaka Lama jong ka HNLC ha ka kurim jong u bah Cheristerfield kum ka dak ban kynmaw burom ia la u nongialam u ba la khlad noh ha u snem 2021.
Hashwa kane, ki nongialam ka HNLC kila pynpaw iaka jingbitar halor ka jingbuh kyndon ka sorkar ba kidei ban leit buh syntiew ha u Lum jingtep Lawmali haka por 8 baje mynstep, hynrie ki nongialam ka HNLC kila pynkheiñ ia katei ka jingbthah bad kila leit ban buh syntiew haka por 2 baje mynsngi ryngkat bad ki bahaiing bahasem jong u Bah Cheris.
U Ksiang ka HNLC u bah Sadon Blah, haba iakren bad ki nongthoh khubor ula ong, haduh mynta kam pat don kano kano ka jingsngewsyier iaki dkhot ka HNLC kiba dang don hapdeng ka jingiakren iasuk hapdeng ka sorkar jylla bad sorkar pdeng.
Ula ong, kiba bun balang kila pynpaw ia ka jingsngew artatien ban shaniah iaka sorkar jylla ban wan iakren iasuk hadien ka jingshah siat iap jong u (L) Bah Cheristerfield.
“Hooid ka long kumta bad kane kadei ka jingsngew na ki bun balang khamtam hadien ka jingshah siat iap u bah Cheris ha kti ki Pulit. Kala don ka jingsngew ba dei ban husiar hynrei haba nga shimti ia kane ka kam ban pyniaid ia ka jingiakren iasuk, haduh mynta ngam iohi ba kan don kano kano ka jingsngew artatien ne ban husiar namar ka jingiakren iasuk ka iaid beit iaid ryntih” la pynkut u Bah Sadon Blah.
Pule lang ia kane: Leit jngoh u CM ia ka Prime Minister Museum ha New Delhi
Peit lang ia kane
 Bah Cheristerfield.){kind=link}