Nongstoiñ, Nailar 11: Ka kompani ksam marpoh khyndew Shree Shree Mining Corporation Limited kala hap ban sangeh noh ia ka jingksam marpoh khyndew ha Mawlangria, kaba don hajan ka Shnong Mawiawtep, Rambrai hadien ba ka Khasi Hills Autonomous District Council (KHADC) kala kyntait ban ai No Objection Certificate (NoC) ia kane ka kompani.
Ka jingkyntait ka KHADC ban ai NoC kala mih namar ka jingpyrshah kaba jur jong ki paidbah ka thain ryngkat ki kynhun Sengbhalang bala lamkhmat da ka FKJGP-Rambrai Circle.
U bah P.Rngaid sordar shnong barim ka Mawmluh II haba їakren bad u nongthoh khubor, u la ong ba ka jingksam marpoh khyndew ha Mawlangria ka la sdang ha u bnai Lber jong ne u snem ba mynta bad naduh ba katei ka jingksam marpoh khyndew ka la sdang, ka la don jingpyrshah kaba jur na ki paitbah nongshong shnong.
U iathuh ba ki sordar jong ki shnong bapher bapheri ka thaiñ kynthup naduh ka Mawliehpoh, Urkhli, Mawmluh II bad kiwei kiwei, ki la shong pyrkhat halor katei ka bynta kumno kin leh, namar ba ki paitbah ki la dawa ba ki dei ban leh ei ei.
Ka FKJGP haba iohpdiang ia ka jingujor na ki Nongialam Shnong, kala leit ban pan jingshai na u Deputy Commissioner ka West Khasi Hills uba la phah da u Majistor ban leit jurip їa katei ka jaka.
U bah Rngaid u la pynkynmaw ruh ba wat hadien ba u Majistor u la wan jurip bad u la bthah їa ki nongpyntrei ba kin sangeh ia ka kam, kane ka kompani kam shym la patiaw bad dei tad haduh ba ki rangbah shnong ki la hap ban leit їakynduh їa u Chief Executive Member (CEM) ka Khasi Hills Autonomous District Council, ha kaba ki la ai da ka jingthoh ba kin ym shah da lei lei ban ksam marpoh khyndew.
Ki la ong ba ki tyllong umbam umdih ki don sawdong jong katei ka jaka bad ka la ktah haduh katta katta їa ka jingkoit jingkhiah jong ki paitbah namar hap pyndonkam їa ka.
