Shillong Nailar 10: U Myntri ka tnad Community and Rural Development Abu Taher Mondal hynne ka sngi Palei ula pyntip ba ka sorkar kala dep ban pyllait 50% ka pisa ban thied ia ki tiar ki tar lyngba ka Mahatma Gandhi National Rural Employment Guarantee Scheme (MGNREGS).
“Ngi lah dep ban pyllait 50% ia ka pisa ha kine ki shi taiew kiba la dep” la ong u Mondal haba iakren bad ki nongthoh khubor. Ia katei ka pisa la pyllait na ka bynta ki kam kiba la dep ban pyntrei hynrei ha kaba iadei bad ka bai bylla la dep ba npha hbeit sha ka Account jong ki riewshimet kiba don ia ki job card.
Ula ong, ba ka jingslem ban pyllait iaka pisa na ka bynta ban thied ia ki tiar ki tar kadei namar ka jingbym pyllait jong ka sorkar pdeng
“Ka jingbhah hapdeng ka sorkar pdeng bad ka sorkar jylla ka long 75% la 25% hynrei lada ka sorkar pdeng kam pyllait iaka pisa kan long kaba eh bha ia ngi ban pyllait iaka 25% ban pynkmen ia u paidbah” ual ong.
U Mondal ula pyntip ruh ba ka sorkar jylla kan sa pynbor ba iaka pisa kaba sah sa 50% naduh u snem 2022 dei ban pyllait noh mardor.
“Kumba nga ong ia phi, ha ki snem ban wan, ngin buddien bad ka sorkar pdeng ba iaka bhah tyngka dei ban pyllait kloi noh khnang ba kan ym don kano kano ka jingktah ia ka jingpyntrei ia ki kam ki jam” ula ong.
Ha kaba iadei bad ki jingkynnoh ba ka don ka jingbamsap ha ka jingpyntreikam ia ki scheme, u Mondal ula ong, “Lada ka don ka jingkynnoh bamsap bad ka long kaba shai kdar ia ka VEC bad lada ka don ka jingujor, dei ban shimkhia mardor bad ban shim ia ki sienjam kiba dei”.
Ha kaba iadei bad ka jingdawa ban pyniasnohlang iaka MLA scheme bad ka MGNREGS, u Myntri sorkar ula ong ba ka MLA scheme kadei kaba iar bha, kumta lada u MLA u kwah ban pyniasohlang bad kiwei pat ki scheme, lah ban pyniaid shakhmat ia katei ka kam bad kam don satia kano kano ka jingeh
