Shillong, Nailar 08 : U Myntri ka Tnad Pule Puthi Rakkam A Sangma ha ka sngi Ba-ar ula pyntip ba ka jingsdang shim klas ba nyngkong (first academic session) jong ka Captain Williamson Sangma State University, kan sdang noh naduh u snem 2024.
“Mynta ngi dang pynkhreh ha kaban thung ia u Vice Chancellor, Pro Vice Chancellor bad kiwei kiwei” ong u Rakkam haba iakren bad ki nongthoh khubor.
Ula pyntip ba ka Sorkar Jylla kala rai ruh ban sa buh ia ka Shillong Campud jong kane ka State University.
Ha u bnai Lber 2023, ka Iingdorbar Thaw Ain ka Jylla kala ai jingmynjur ia ka Captain Williamson Sangma State University (Amendment) Act, 2023, ban pynkylla ia ka Captain Willianson Sangma Technical Unversity sha ka State University ba pura.
Ka jingthmu jong kane ka Act ka long ban don noh iala ka jong ka State University ka ban ai jingshakri ha ka liang ka pule ka dangle ba kynthup naduh ka higher bad technical education nalor ka lad ban leh research bad kiwei kiwei.
Halor ka jingeh ba mad da ki samla pule ban iakhun ia ka eksam CUET, u Rakkam ula ong ba ka Jylla kan sa ioh sa kawei ka centre ha Jowai nalor ki lai tylli ki cente ba don mynta ba kynthup ia 2 tylli ha Shillong bad kawei ka Tura.
