Shillong, Naitung 26: Ka NEHU Student Union (NEHUSU) hynne ka sngi ki la kynduh ia u Myntri ka tnad pule Rakkam A Sangma bad pynpaw ba ka jingshim rai kyrkieh u Vice Chancellor (VC) ka NEHU ban pyntreikam iaka National Education Policy (NEP) naduh 1 tarik Nailar 2023, kan ktah jur ia ki samla pule.
Haba kren sha ki lad pathai khubor u president ka NEHUSU samla Ready First June Nongbsap ula ong ki samla pule kim don jingpyrshah iaka NEP hynrei kan dang shimpor pat iaki jaka pule lane ki College khamtam ha ki thain kyndong ban pyntreikam ia kane ka Education Policy namar ba ki dang don hapdeng shibun ki jingduna.
U samla Ready ula pyntip ba haka jingialang bad u Myntri, la pyntip ba ka sorkar ruh ka sngewiahap ban pyntreikam iaka NEP naduh 2024 bad halor kane ka sorkar kala dep thoh haduh 3 sien shaka NEHU ban pynsngew ba ki College kim pat kot bor ban pyntreikam iaka NEP naduh 1 tarik Nailar 2023.
“Watla ka Academic Council jong ka NEHU kam pat shim rai ban pyntreikam iaka NEP naduh mynta u snem hynrei ka long kaba sngew lyngoh ba u VC u ong ban pyntreikam naduh ka 1 tarik u Nailar. Ka jingpynrung klas ha ki UG kala dep naduh u bnai Jylliew kumno mynta yn pynkylla noh ia ka Course kaba la dep ban pynmih ha ki Prospectus” ula buh jingkylli.
U samla Ready ula ong ba lada ka NEHU ka iaid shakhmat ban pyntreikam iaka NEP naduh 1 tarik Nailar ka jingshah ktah bad ka jingduh nong kadei hi ki samla pule namar ki samla pule ki hap ban siew tam ia ka bai klas bad kumta kan buh jingeh bha ia ki samla pule khamtam kito kiba wan na ki longïing kiba kham duna ka ioh ka kot.
Haba kylli na ka liang u Vice President ka NEHUSU u samla Easterson Sohtun ula iathuh ba naka liang u Myntri u la kular ha ki ba shen kin sa phah biang sa kawei pat ka shithi sha u Vice Chancellor ban pynsangeh shwa ia kane ka jingpyntreikam ia ka NEP.
