Shillong Naitung 26: U MLA ka Nongpoh Constituency u Bah Mayralborn Syiem hynne ka sngi Palei, ula pynrem jur ia kiba thombor ia u Myntri Rangbah ka jylla katba u dang lum ia ka jingialang bad ki kynhun snegbhalang ha Chief Minister Office, Tura ha ka Lah Sngi U Blei.
Haba iakren bad ki nongthoh khubor u Bah Mayralborn Syiem ula ong ba kino kino kiba donkti ha kaban pynmih ia katei ka jingklumar ym dei ban don jingmap ha khmat jong ka aiñ.
Watla u DGP ka jylla u Dr LR Bishnoi ula ong ba katei ka jingjia kadei kaba la iasuhbuit lypa bad pyntip ba kila don 23 ngut kiba la shah kem haduh ka miet jong ka sngi Baar.
U Bah Syiem ula ong, ba ym lah ban len ba kala don ka jingduna ha ka rukom treikam jong ka bor pyniaid district bad ka tnad pulit, hynrei kam shym la don pat ka jingktah iaka shongsuk shongsaiñ.
“Ka sorkar kala long kaba husiar bad kaba peitngor bad ngi ai ka jingkyrshan kaba pura iaka sorkar jylla na ka bynta ban pynneh iaka shongsuk shongshngaiñ hapoh ka jylla” ong u Bah Syiem bad ula ong ba ka jylla Meghalaya kadei ka jylla kaba suk ba saiñ bad kum kitei ki jingjia kim dei ban iai jia biang nangne shakhmat.
Lah ban kdew ba ki riewshim kabu kila pynmih iaka jinghuri hura, katba u Myntri Rangbah ka jylla u dang lum ia ka jingialang bad ki kynhun sengbhalang ban iakren halor ka jingdawa ban pynlong iaka Nongbah Tura kum ka Winter Capital ne Nongbah Tlang bad ban pyntreikam aika Roster System naduh ki snem kiba la leit.
U DGP ka jylla ula iathuh ba katei ka jingthombor ki paidbhur kadei kaba la dep ban iasylla bad iasuhbuit lypa ban pynmynsaw bad ban shim syndon iaka jingim jong u Myntri Rangbah ka jylla.
Ula iathuh ba ha katei ka jinghuri hura kial don 21 tylli kiba la julor, ha kaba 4 tylli kila sahah wiang ding bad 17 tylli kila julor naka jingshah ther maw bad kila don 18 ngut kiba la mynsaw kiba kynthup ia ki 10 ngut ki pulit ka jylla, kawei ka pulit Homeguard bad 7 ngut ki CRPF.
