Rai ka KHADC ban pynthymmai ka KTMC, yn plie noh shen ia ka Traditional Medicine Institute

Shillong Naitung 25: Ka Executive Committee (EC) jong ka Khasi Hills Autonomous District Council (KHADC) hynne ka sngi Ba-ar, ka la rai ban pynthymmai noh ia ka Khasi Traditional Medicine Commission.

Haba kren sha ki lad pathai khubor hadien ka jingialang jong ka Executive Committee, u CEM ka KHADC bah Pyniaid Sing Syiem ula ong ba kane ka Commission ka ju khot aplekeshon ia ki nongai dawai kynbat Khasi bad kino kino kiba kwah ban ioh ia ka jingithuh kat kum kane ka Ain ki hap ban wan aplai ia kane.

U bah Pyniaid ula ong ba ia kane ka Commission yn khlieh da u Chief Executive Member (CEM) kum u Chairman bad lyngba kane ka Commission yn sa bishar bniah ia ki aplikeshon khnang ban ioh ai syrnod iaki ba sumar dawai Khasi.

Nalor kane u bah Pyniaid ula pyntip ba shen ka KHADC kan sap lie noh iaka Khasi Traditional Medicine Institute ha Lum Sohpetbneng kaba ladep ban pyntrei bad kaba sah mynta ka long sa tang katto katne ki kam barit baria kum ka umbam umdih bad kiwei de.

Ula iathuh ba ka KHADC ruh kan sa khot ia ka EOI na kiwei ki Institute kiba hapoh ka jylla bad na shabar kiba la pyntbit ia kane ka jingai dawai kynbat ban pyniaid iaka Traditional Medicine Institute ha Lum Sohpetbneng .

U CEM, u la iathuh ruh ba ka EC ka jingthmu ruh ban buh ia ka Laboratory khnang ba ki nongsumar dawai khasi kin ioh ban test ia ki dawai ba ki pynmih ha katei ka jaka khnang ba kin long kiba khuid ba suba bad kan nym don jingktah ia ka koit ka khiah.

Pule ruh: Pan jingiatreilang u DGP na Assam ban kem ia ki ‘Kingpin’ ba pyniaid kam tih dewiong beain bad karkhana coke