Nongstoin, Naitung 24 : Ka Khasi Jaintia Presbyterian (KJP) Synod Sepngi, kala shim ia ka sienjam ban kyntiew ia ka pule puthi ha ka kyrdan High Education ha West Khasi Hills District, da kaba plie ia ka Synod College ha Nongstoin.
Ia kane ka College la plie paidbah da u Myntri ka Tnad Pule Puthi Rakkam A Sangma ha ka jingialang kala la pynlong ha phyllaw ka skul KJP kaba don ha Tiehsaw, Nongstoin.
Kiba la iadonlang ha kane ka sngi ki kynthup ia u MLA/MDC ka Nongstoin Bah Gabriel Wahlang, ki Pastor ka KJP Synod kynthup u Rev S.S Majaw, President Governing Body ka Synod College, Shillong bad la pyniaid ia kane ka jingialang da u Dr.M.Rani vice Principal.
Haba ai jingkreni, u Rakkam A. Sangma u la pynpaw ia ka jingsngewkmen ba ka Nongstoin kan ioh ia kane ka jaka pule ka ban ai jinghikai bad ka ban tei ia ka imlang ka sahlang bad ka jaidbynriew hi baroh kawei.
U la ai ka jingiaroh ia ka Governing Body jong ka Synod College Nongstoin kaba la iohi jngai na ka bynta ban seng ia kane ka kolej kaban long shisha ka jingmyntoi ia kiba ai jinghikai bad kiba shah hikai.
U Myntri ula pyrto ia ki mishoneri jong ki Balang Khristan kiba la wan sha ka jylla ban pynkylla dur ia ka sain pyrkhat, ka pule puthi bad ka longrynieng bad u la ong ba ngi long kumne kumba ngi long kadei da ka jinglen lade ka jong ki.
U Myntri u la pynkynmaw ruh ba ka pule puhti kadei kata ka jingthew kaba thew ia ka jingroi jong ka jylla bad ka ri hi baroh kawei. Man uwei pa uwei u briew, u don ia la ka jong ka thong ha ka jingim ka jong u, bad kata ka thong kadei ban kyntiew ia ka longbriew man briew bad ka jaitbynriew hi baroh kawei.
Ha kane ka sngi, na ka liang jong u myntri u la kular ba ka sorkar kan iatreilang bad ka kolej na ka bynta ban kyntiew shuh shuh bad ban iarap ia ka kolej haba ka iakynduh ia kino kino ki jingeh.
