Tura, Naitung 24 : U Myntri Rangbah ka Jylla Conrad K Sangma lem bad 5 ngut ki Pulit pahara, kila sahkut ha Chief Minister Office (CMO), Tura namar ka jingkhie kynsan kynsan ka jingkulmar shabar jong ka jaka ba pynlong ia ka jingialang hapdeng jong u (CM) bad ki Sengbhalanglem bad ki kynhun bapher bapher hynne ka janmiet sngi Nyngkong.
Kane ka jingkulmar kala mih haba ki paidbhur kim shym la hun satia ia kaei kaba mih na kane ka jingialang, kaba la pynlong ia ki ban shim ia u pud haduh ban lun maw sha ki bor pahara bad sha kane ka jaka ba shong jingialang. Ia kane ka jingkulmar la pynmih da ki riew shimkabu kiba la wan ban sngap ia kaei kaba mih na kane ka jingialang.
Haduh 5 ngut ki Pulit kiba pahara kila mynsaw ha kane ka jingjia bad ki Pulit kila hap ban siat da ki tyndong lyer pynsat khmat sha ki paidbhur ban pynsaphriang ia ki.
Ka jingialum paidbah shabar ka CM Office kala sdang naduh ka por janmiet shuwa ban sdang ka jingialang hapdeng u Myntri Rangbah bad ki kynhun bapher bapher.
Ki Kynhun Sengbhalang bala ialam da ka ACHIK kynthup ka GHSMC bad kiwei, kila iashong shah jingit la artaiew habar jong ka Mini Secretariat, Tura, ban dawa pyntreikam ia ka Roster System naduh ki snem bala leit noh bad ban wanrah ia ka Winter Capital ha Tura.
Ka jingialang ba pynlong hynne ka sngi ka dei kaba kongsan bha halor ka jingdawa jong ki Kynhun Sengbhalang, kiba la ap khmih lynti ba ka jingmih kan long kaba seisoh bad ba u Myntri Rangbah un ai ia ka rai kaba skhem.
Ka jingdawa jong ki, kala sawa ha baroh kawei ka Ri-lum Garo, ha kaba la pynlong ruh ia bun ki kynhun bad ki paidbah ba kin iasnohkti lang ha ka jingiakhih kaba la iaid la artaiew.
Namar ba ka jingkulmar kala nang heh, u Myntri Rangbah da lade ula khmih ia ki Pulit pahara kiba mynsaw ha ka jingshah lun maw.
Kat haduh ba thoh ia ka khubor, u Myntri Rangbah bad ki bor pahara ki dang sahkut shapoh ka Mini-Secretariat namar ka jinglong jingman ka dang sniew shabar bala jur ka jingkulmar. Wat hapdeng ka jingsiat tyndong lyer pynsat khmat, ki paidbah kim shym phet satia bad ki dang iai bteng ha ka jingther maw.
