Shillong, Naitung 24 : Ka Myntri ka Koit ka Khiah Kong Ampareen Lyngdoh ha ka sngi Nyngkong kala pyntip ba ka Sorkar Jylla kan sa shim ia ka rai hapoh ka lai bnai halor ka jingtreikam jong ka 108 Emergency hapoh ka Jylla.
“Ngi kyrmen ba haba kut jong kine ki lai bnai ban wan, ngin sa lah ban shim ia ki rai bad wat ki workers Union ruh kin lah ha kaban sngewthuh ba ha kano ka jinglong jingman ba ki don” ong ka Kong Ampareen haba iakren bad ki nongthoh khubor hadien ka jingialang bad ka kynhun ki Nongtrei ka 108.
Ka pyntip ba kane ka seng ki Nongtrei 108 kila aiti ruh ia ka thup jingai jingmut bad ki jingkyrpad ha ka dur jong ka dorkhas ban ai jingiada ia ka jingshakri ka jong ki.
“Bad nga la kular ba ngan sap hah ia ka sha ka National Health Mission (NHM), kaba dang pynkhreh mynta ia ki kot ki sla ban khot tender. Bad ka jingkyrpad ban tyrwa ka dei kaba dang pynkhreh. Ka kam ka kam kan sa sdang tyllun noh” ong ka Kong Ampareen.
Kat kum ka jingong jong ka, ki don ki nongtrei kiba la trei la palat 15 snem ha ka kam.
“Ki dei ki Union bad ngi dei ban sngap ia kaei kaba ki ong. Kaei kaba lah ban leh nga la ong ha ki ba ngin leh hynrei ia kaei kabym lah ban leh ruh ngin sa iasyllok bad iakren shuh shuh bad kano kano ka kompani kaba ioh ia ka RFP (Request for Proposal) bad ngin sa peit kumno ngin iaid shakhmat” kala bynrap.
Haba pynpaw ba ka Sorkar kam dei satia ka bor ba lah ban pyniaid ia ka jingshakri 108, ka kong Ampareen kala ong “Haba sdang, ngim don wat tang ia ka mechanical wing ha ka tnad ka koit ka khiah hapoh ka Jylla Meghalaya”.
“Mynta, kumba la leh ha kiwei ki Jylla ka Ri, ka Sorkar ka pynjngai ialade ha kaban leh ia kane ka kam ban shakri ia kiwei lyngba ka 108 ambulance” kala ong haba bynrap “Ngin sa iapynbeit bad baroh kiba iathong ban shimti ia ka kam bad ngin sa pyrshang ban ai jingiada ia ka jingshakri jong kine ki Nongtrei”.
Ka Myntri kala pynpaw ruh ba ka Sorkar Jylla kam don jingthmu satia ban shimti ha kaban pyniaid hi ia ka 108 Emergency Service.
Pule lang ia kane: Yn pan kaiphod ka Myntri ba khlad u Samla ba aksiden kali ha NEIGRIHMS
