Shillong, Naitung 21: U Myntri Rangbah ka jylla u Conrad K Sangma haka jingdon lang u myntri ka tnat jngohkai pyrthei u bah Paul Lyngdoh ula ai khusnam daka “Ateliers Meghalaya Awards” shaki 7 ngut ki nongshna jingshna na kylleng ka jylla Meghalaya.
Haba kren ha kane ka sngi u Conrad ula ong ba kane ka khusnam ‘Ateliers Meghalaya Award’ bala sdang naduh 2021 ka dei naka bynta kyrshan bad ban ithuh iaki nongshna jingshna, ki nongthain jingthain bad kiwei kiwei de kum shi bynta ban kyntiew iaka ioh ka kot jong ki paidbah ha man la ki shnong jong ka jylla.
U Conrad ula iathuh ba ka project ‘Ateliers Meghalaya Award’ lyngba ka Meghalayan Age Project kan long ruh ka lynti iaki nongshna jingshna na kylleng ka jylla ban pyninam iala ki tiar ki tar ba ki shna bad kum juh ruh ban pynpoi iaki mar jong ki sha ki iew bapher bapher.
Ula iathuh ba naduh 2021, ka sorkar jylla kala iarap kumba 23 ngut ki nongshna jingshna na kylleng ka jylla daka song pisa ba T. 5 lak bad naka liang ka sorkar kan iai bteng ban iarap bad ban kyrshan iaki ba kin bteng iala ki kam ba ki trei khnang ban kiew ka ioh ka kot.
“Kum kine ki prokram lane ki jingai khusnam ki don bynta lang bad ka thong jong ka sorkar bad ki polisi jong ka sorkar ban pynthikna ba ki nongshna jingshna na kylleng ka jylla Meghalaya ki ioh iaki lad jingiarap haki bun bynta” la ong u Conrad.
We are proud of our unique arts and craft and through the project, artisans are being assisted to develop their businesses, improve their products, and access new markets. We will continue to support artisans from the state through the project. pic.twitter.com/Mbjmef4YtO
— Conrad K Sangma (@SangmaConrad) July 21, 2023
U Conrad ula ong ruh baka jingiarap naka sorkar ia ki nongshna jingshna kam dei tang ban kyntiew iaka ioh ka kot hynrei kadei ruh ban pyniam nam iala ka riti dustur ka jylla sha baroh kawei ka pyrthei lyngba ki tiar ki tar ba ki nongshna jingshna na kylleng ka jylla Meghalaya ki shna.
Ula ong ba ka sorkar lyngba ka ‘Ateliers Meghalaya Award’ bad ka ‘Meghalayan Age Store’ ka kwah ruh ban kyntiew iaka kam jngohkai pyrthei sha baroh kawei ka pyrthei namar ki paidbah ka jylla ki lah ban pyninam iala ka jingdon jingem ha man la ki shnong ki thaw.
Pule ruh: Hiar tohkit ka Estimate Committee ia ki project ba sahteng ka Tnad Pule Puthi bad ka Koit ka Khiah
