Nongpoh, Naitung 18: U Paiem ka Raid Nongtung Bah Niwel Shadap u khlad noh mynta ka step ka 18 Tarik Naitung 2023 ha ka por 9 baje mynstep ha iing sah jong u hadien ka jingban ka jingshitom kaba la katto katne bnai.
U Bah Niwel Shadap (Bam Kwai Ha Dwar u Blei), u dei u Paiem ka Raid Nongtung u ba la iakhun tyngeh ban iai dawa na ka sorkar jylla Meghalaya ba kan phaikhmat ia ki jingeh ba la mad da ki nongshong shnong ha khappud ka Raid Nongtung tang na ka jingshah pynthud ba man ka por ha ki bor jong ka Assam.
U Bah Niwel Shadap u dei ruh u wei na ki nongialam ka Raid Nongtung ban dawa pynbeit mardor ia ka jingiakajia khappud bad ban pynbeit noh ia u pud u sam ba tikna hapdeng ka Meghalaya bad Assam, khamtam ban dawa ruh ba ki shnong kiba hap hapoh ka Raid Nongtung kim dei ban leit sha ka Assam ha ka jing pynbeit pud hapdeng kine ki sorkar jylla khamtam kumba 30 tylli ki shnong kiba angnud dikdik ban iasoh beit bad ka Meghalaya.
Wat hapdeng ka rta jinglong rangbah bad jingnoh ka rta u Bah Niwel Shadap um shem la shong thait ban iai shakri ia u paidbah ka Raid Nongtung ba kin nym Shah leh bein ne mad jingeh ha kaba na ka por sha ka por u ne u rangbah u ju leit tynjuh bor ruh bad ka District Council halor ki mat bapher bapher na ka bynta ka bha ka miat Jong ki paidbah ka Raid Nongtung nalor kiba bun tylli ki jinglen lade jong u kiban pynsahnam ia u bad ia ka pateng kaban sa wan jong ka Raid Nongtung.
Ka jing khlad noh jong u ne u rangbah ka la long kumba tap lyoh syndet ia ka Raid Nongtung hynrei ka jing angnud jong u halor kiba bun ki mat kin nang iai bteng ban pyn urlong lyngba kiwei pat ki nongialam jong ka Raid Nongtung.
Yn pyndep ia ka jingleh niam pyndon burom kaba khatduh ia u Paiem Niwel Shadap ha ka 20 Tarik u Naitung 2023 ha ka iing sah jong u ha Umpohwin ha ka por 1 baje nohphai sngi.
Pule ruh: Shimkhia ka NFR ban pynpoi ia ki marbam bad ki mar ba donkam sha Manipur
