Nongpoh, Naitung 18 : Ka Khasi Students Union (KSU)-North Khasi Hills, ha ka sngi Nyngkong, kala pynkup burom ia ki 75 ngut ki samla pule kiba pass bha ha ki kyrdan eksam naduh ka SSCL, HSSLC, Degree bad PhD da ka khusnam Fr. Sylvanus Sngi Lyngdoh Maitshaphrang Academic Excellence Award, 2022-2023.
Kane ka jingsam khusnam ka long ruh shibynta jong ka jingkynmaw burom ia ka lyngkhuh sngi iap ba 188 jong u Khlawait ka Ri u Tirot Sing Syiem ha kaba ki Nongialam ka Seng bad ki samla pule kila pynlong ia ka jingsngap jar ba shiminit ban ai burom bad ban kynmaw ia u synniang jong u Tirot Sing. Ia kane ka jingialang la pynlong ha District Library, Nongpoh.
La pynshongkun ia kane ka jingialang da ka jingiadonlang u samla Shemphanglang L Mawphlang, Vice President barim KSU Sengkmie, samla Pynshaiborlang Rani, Information & Publicity Secretary KSU CEC, Samla Albert Sngi Lyngdoh, Pyrsa jong u (L) Fr. Sngi, ki nongialam ka KSU, NKHD ba kynthup ia u samla Ferdynald Kharkamni President, samla James Mawphniang, Secretary nalor kiwei kiwei ki riew pawkhmat ka them Ri Bhoi nalor ki samla pule, ki kmie ki kpa lem bad kiwei kiwei.
Haba kren ha kane ka sngi, na ka liang ki nongialam ka KSU, ki la pynpaw ia ka jingkmen kaba khraw ban sakhi ba ki samla pule jong ka Ri Bhoi District ki la nang paw nang paw na kawei ka snem sha kawei pat khamtam na ka jingmih ruh ki samla kiba la paw kyrteng hapoh ka thup top 20 ha ki eksam bapher bapher.
Ki la pynpaw ruh ba ka sienjam jong kane ka jingpynkup burom da kaba ai nam ruh ia u Fr. Sylvanus Sngi Lyngdoh ka long ba ka seng hi ka burom ia u synniang u bynhei ba la noh la bet da ki riewkhraw na kane ka district, khamtam u Fr. Sngi u dei u ba la don bynta ha kiba bun ki liang naduh ka thoh ka tar bad kiwei kiwei ki jingshakri paidbah khamtam eh ruh u Fr. Sngi u la don bynta ruh ha ka kynhun ban dawa na ka sorkar pdeng ban pynrung ia ka ktien Khasi hapoh ka khyrnit kaba 8 jong ka riti synshar ka ri India Constitution of India.
Shuh shuh ruh, kum ki nongialam ka kynhun sengbhalang kaba peit ia ka bha ka miat jong ka jylla Meghalaya bad ka Jaidbynriew hi, ki la kyrtiang dien ruh ban pharia ia ki synniang ba ki riew khraw jong ka jaidbynriew ki la len lade ban pynim ia ka ri bad ka jaidbynriew khamtam kum ka jinglen lade jong u Syiem Tirot Singh Syiem ha ka jingiakhun ia ka thma pyrshah ia ki dohlieh ha kito ki snem barim bad kine ki nongialam ki la kyntu jur ia ki samla pule ba ym tang ba kin long kiba khlain ka jingmut jingpyrkhat ha ka pule ka puthi ki dei ban don ruh ka mynsiem kaba khlain ba kumno kin nang rah ia ka nam ka burom jong ka jaidbynriew ha kiba bun ki liang jong ka jingim bad ka lawei ka jong ki.
La pynphuh pynphieng ha kane ka sngi, da ki jingput jingtem bad jingrwai tynrai kiba myllung ba la shimbynta da ki samla pule ka Ri Bhoi College Traditional Institute.
Pule ruh: Thaw ki samla ia ka Ri-Bhoi Peoples’ Council ban shakri ia ka Them Ri-Bhoi
-North Khasi Hills, ha ka sngi Nyngkong, kala pynkup burom ia ki 75 ngut ki samla pule kiba pass bha ha ki kyrdan eksam naduh ka SSCL, HSSLC, Degree bad PhD da ka khusnam Fr. Sylvanus Sngi Lyngdoh Maitshaphrang Academic Excellence Award, 2022-2023.){kind=link}