Shillong , Naitung 12: Ki Khun hajar jong ka Hima Langrin hynne ka sngi kila ia mih paidbah ban pynrem ia u P.S Lyngdoh uba la leit thad paidbah ha ryngkat bad ka jingkynnoh ba u Nangtiesingh Syiemiong u Syiem ka Hima u pynkylla jaka shimet iaka khyndew Hima.
Lah ban kdew ba ha ki khyndiat sngi bala dep, u P.S Lyngdoh ha ryngkat ki katto katne ngut ki samla kila leit sha ki shnong bapher bapher kiba don hapoh ka Hima ban ialap ba u Nangtiesingh Syiemiong, Syiem ka Hima Langrin ula pynkylla jaka shimet iaka khyndew Hima.
Haba kren sha ki lad pathai khubor u bah Enboklang Nonglang ula pynshai daka ba ong “Kane ka jingkynnoh u P.S Lyngdoh ba u Nongtiesingh Syiemiong u Syiem ka Hima Langrin u pynkylla jaka shimet iaka khyndew Hima ka long kaba bakla bad ka bym don nongrim bad ngi ki khun ki hajar ka Hima ngi pynrem jur”.
U bah Enboklang ula iathuh ba naduh u snem 2011, ki ar tylli ki lyngkhot khyndew kila dei ki jingdon bynta lang ar liang (Joint Property) namar ba ha u snem 2010 haba la wan long Acting Syiem u Paiem Nangteisingh, ka la don ka jingiakren kaba sani bha ha baroh kawei ka Hima ban shu iasuk noh namar ka jingdon ka mukotduma kam wanrah jingbha eiei ruh em hynrei ka la pynwit ia ka roi ka par ka Hima bad ha u Nailur ka la mynjur ban iasuk noh.
Ula ong ba kane ka jingkynnoh ba u Syiem Nangteisingh u la shim hi halade iaka pisa ban ai sha ka kam u Blei ka long ka bym shisha namar ba dei ka Executive Dorbar ryngkat u Syiem ba ki la pyrkhat ba dei ban ai jingkyrshan sha ki Balang bad ka kam u Blei naka jingioh pisa ka Hima bad ka EC ka la iakut ban ai pisa jingiarap mar T.4 lak sha kawei pa kawei ka Balang kiba don hapoh ka Hima Langrin.
Shuh shuh ula iathuh ba ki don 36 tylli ki Balang hapoh ka Hima Langrin bad ka jinglut na bynta kine ki Balang ka long T.1,44,00,000 klur sha baroh.
Haba iadei bad ka jingkynnoh baka Management Board ka ai patta rep, u bah Enboklang u la ong ba ka Board ka ai Patta rep tang ia ki briew kiba na bar ka Hima bad ia kiwei pat ki jaidbynriew ki ba shong basah ha ka Hima.
