Shillong, Naitung 10: Ka Myntri ka Rep ka Riang kong Ampareen Lyngdoh kala pyntip ba shen kan sa phah jingthoh sha u Myntri Rangbah ka jylla ba un lum ka jingialang ban iakren halor ka jingeh ba ki nongrep ki kynduh namar ka jingdon ki khyrdop lum khajna.
Kane ka jingpyntip ka Myntri kadei hadien ka jingialang bad ki nongrep na kylleng ka rilum Khasi-Jaintia ha kaba ki nongrep kila pyntip halor ka jingeh ba ki iakynduh namar ka jingshah khrong khajna ha ki khyrdop kiba don hapoh ka rilum Khasi-Jaintia.
Ka kong Ampareen kala ong “Ki khyrdop lum khajna ki long kum ki mawjynthut iaki nongrep bad kane ka ktah iaka ioh ka kot jong ki nongrep kiba trei shitom ba pynmih iaki mar rep naka bynta ka jingdonkam ki paidbah ka jylla baroh kawei”.
Ka kong Ampareen kala ong ba kum ka Myntri kan shim khia ia kane ka jingud ki nongrep bad kan sa pynsngew ia kane ka juh ka mat sha u Myntri Rangbah ka jylla ban shim rai halor kane naka bynta ban ai mynsiem bad ban pynshlur iaki nongrep ka jylla ban nang trei shitom ha ka ban lah ban pynmih khambun shuh shuh ki mar rep naka bynta ka jingdonkam ka jylla.
“Ngam ong la kine ki khyrdop lum khajna ki long ain ne beain, la ki long ka jingmyntoi ne duh nong hynrei katkum ka jingpynsngew ki nongrep, kine ki khyrdop ki long ka jingduh nong iaki nongrep bad ngi dei ban pynduh ia kum kine” kala ong.
Pule lang ia kane: Plie u Myntri ka Sorkar Pdeng ia ka jaka pynmih tungtab ha Eastern West Khasi Hills
