Shillong, Naitung 09: U Lat ka jylla u Phagu Chauhan hynne ka sngi ula leit ban sakhi iaka lehniam Behdieñkhlam kaba la long ha Jowai haka jingdonlang u Chief Justice jong ka Meghalaya High Court u Justice Sanjib Banerjee.
Hapdeng ka jinglehniam bad ka jingkyrhoi, ka jinglehniam Behdienkhlam kala kut noh mynta ka sngi hapoh ka jaka lehniam Aitnar kaba jngai kumba 65 km na nongbah Shillong.
Ha kane ka sngi pynkut iaka lehniam Behdieñkhlam la wansakhi da u Lat ka jylla bad haka jingkren ula iaroh iaka jingriewspah ka jylla haki liang ka dustur, ka riam bad kiwei kiwei de.
U Lat ka jylla ula kitbok ba kane ka jingleh niam Behdieñkhlam kan wanrah ka jinglong kawei hapdeng ki paidbah bad kan wanrah ka jingshong suk shong sngain hapoh ka jylla baroh kawei.
Ka Behdeinkhlam ka dei ka jinglehniam ban beh iaki khlam bad ia kane ka jinglehniam la rakhe haka taiew ba khatduh jong u bnai Jylliew lane taiew nyngkong jong u Jymmanh hadien ka jingbet symbai ban kyrpad ia u nongbuh nongthaw ban kiew bha ka jingioh nongbah haka por kheit.
Iaka Behdieñkhlam la pynlong daka Sein Raij ha Jowai kaba la sdang naduh 6 tarik mynta u bnai.
