Nongstoiñ, Jylliew 26: Ka Myntri ka koit ka khiah kong Ampareen Lyngdoh kala hiar jurip hynne ka sngi Nyngkong ia ki jaka sumar kiba don ha sor Nongstoin bad kular ruh ba ka Sorkr kan sa pynpoi noh ia ki tiar ki tar jong ka MCH Hospital, Nongstoin hapoh ka lai bnai.
Ka myntri ka la leit ban jngoh ïa ka MCH Hospital kaba don ha Civil Hospital barim, ka TB hospital kaba don ha Nongstoiñ, ka Civil Hospital Nongstoiñ bad bad kiwei kiwei. Hadien kane, ka Myntri ka la ïoh ban pynlong ïa ka jingïakynduh lang bad ki ophisar sorkar bapher bapher kumjuh ruh bad ki sengbha lang jong ka thaiñ.
Ha katei ka sngi la ïadonlang ruh u bah Garod LSN Dykes Deputy Commissioner ka West Khasi Hills District, bah Gabriel Wahlang MDC/MLA ka Nongstoiñ konstitwensi, bah Methodios Dkhar MLA ka Mawchynrut konstitwensi, bah R.G Momin MLA ka Rambrai Jyrngam konstitwensi bad u bah Shakliar Warjri MLA ka Mawthadraishan konstitwensi bad kiwei kiwei.
Haba kren sha ki lad pathai khubor hadien ka jingïalang bad ki tnad sorkar bapher bapher, ka kong Ampareen Lyngdoh ka la ong, “Ia ki tiar jong ka MCH Hospital Nongstoiñ, la hap ban pynkynriah noh bad nang ai noh sha Mawkyrwat namar ba ka Sorkar kalaa dep ban plie ïa ka Hospital ha Mawkyrwat bad kane ka hospital la don hapdeng ki jingduna ha ka jingdon ki tiar ki tar”.
Ka la ong “Sa kawei ruh ïa kine ki tiar la dep thied ha ki ar bad lai snem mynshwa. Kumta lada ïai buh sah hajuh khlem pyndonkam, kine ki tiar ki lah sniew bad sarang noh. Na ka bynta ka Nongstoiñ pat, ka sorkar ka la dep mang kyrpang da kiba thymmai bad hadien lai bnai, yn pynpoi noh ia ki tiar”.
Haba kylli lano yn plie noh ïa ka MCH bad hato don ne em ka jingthmu ban pynbun shuh shuh ia ki jingthiah ha Civil Hospital, ka Myntri ka la ong, “Kane ka kam ha MCH ka dang don ha ka jingïapynbeit. Hynrei ha kaba ïadei bad ka Civil Hospital Nongstoiñ, nga la wan ban jurip, nga la ïohi bad sngewthuh ba don shibun ki jingdonkam kiba sorkar ka hap shimkhia. Hynrei, ïa kata pat ka dei ka kamram jong ki local MLA ba kin ïatai sani bha bad ïa pynbeit ryngkat u DC bad kiwei kiwei. Hadien kata kin sa ai ka kaiphod sha nga”.
Pule ruh: Dawa ka HYC na u Myntri kam ïalehkai ban wanrah madan phlang plastic
