Shillong, Jylliew 24: U Myntri Rangbah ka jylla u Conrad K Sangma hynne ka sngi ula leit iashimbynta haka jingialang jong baroh ki seng saiñ pyrthei (All Party Meeting) kaba la lum da u Mynti Kam Pohiing ka Ri u Amit Shah ha kaba iadei bad ka jinglong jingman ha ka jylla Manipur.
U Conrad Sangma uba long ruh u National President ka NPP ula ong, “Ha katei ka jingialang baroh ki seng saiñ pyrthei kynthup iaka National Peoples Party (NPP) kila pynpaw iaka jingsngewkhia ia ka jingjia kaba jia mynta hapoh Manipur bad ngi la kyntu iaka Sorkar Pdeng ba dei ban shim ia baroh ki lad ki lynti ban pynthikna ba ka jingsuk bad jingshngaiñ kadei ban wanphai biang hapoh ka jylla Manipur”.
“Ngi la kyntu iaka Sorkar Pdeng ba kadei ban pynthikna ba ka jingai jingiarap bad ki marbam mardih kaba ki paidbah ki donkam kadei ban poi sha ki bad dei ban pynthikna ba ka jingsam ia kitei ki jingiarap kadei ban bun bad kaban iaid beit iaid ryntih ha baroh ki jaka, khamtam ha ki Relief Camp ne ki jaka sah riehtngen kiba shipor kiba don ha katei ka jylla” ong u National President ka NPP.
Ula ong, ba ka seng kala banjur ban wanrah biang iaka shongsuk shongshngaiñ ha kaba ka Sorkar Jylla, Sorkar Pdeng bad baroh ki seng saiñ pyrthei kidei ban poi sha ki paidbah bad ban kyntu ia ki paidbah ban wanrah biang iaka shongsuk shongsaiñ ha Manipur bad ban poi sha ki seng bad ki kynhun niam bapher bad ban shim ia ki sienjam khamtam haba ki niam bapher bapher kila shah ktah jur bad bun ki jingtei ki jongki kila shah pynjulor.
“Donkam ban pynthikna ba ki kynhun kieng atiar kiba donkti ha ka kam thombor bad kam iaumsnam dei ban leh da kaba tyngeh da ka Sorkar Pdeng ban pynthikna ba kin ym iohlad ba kin iaid shakhmat bad kino kino ki kam iaumsnam bad dei ban tehlakam ia ki bad ha kajuh ka por ka Sorkar Pdeng kadei ruh ban shim ia ki sienjam ban ioh iaka jingshaniah na ki paidbah ka Manipur kaba kynthup iaka jingleit jurip jong u Myntri Rangbahduh ka ri bad u Myntri Kam Pohiing ka ri bad kiwei kiwei ki nongialam jong ki seng saiñ pyrthei kidei ban leit sha Manipur bad ban kyntu ia ki paidbah ba kidei ban phaikhmat sha ka jingsuk bad ban pynthikna ba sa shisien ka jylla Mnaipur kan shongsuk biang” ong u Conrad.
Ula ong ba ka NPP ka ai ruh ia ka jingkular ban ai ka jingiatreilang ban leh iala ka bynta ban wanrah biang iaka jingsuk ha Manipur.
Pule ruh: Ha ka sien kaba nyngkong ioh sakhi ki khynnah skul iaka Dorbar KHADC
 kaba la lum da u Mynti Kam Pohiing ka Ri u Amit Shah ha kaba iadei bad ka jinglong jingman ha ka jylla Manipur.){kind=link}