Shillong, Jylliew 22 : Ki bor Pyniaid District ka East Khasi Hills kila phah kynriah noh ia baroh ki briew kiba sah ha ka Iing jong u Dr ML Deb ha kaba don hajan ka Hotel Heiga, Lachumiere namar ka jingshong synjor na ka jingtwa khyndew.
Kane ka jingbthah kala mih hadien ka jingiohi ba kane ka Iing kala don hapdeng ka jingima baka lah ban twa ne khyllem namar ka jingsynjor ka khyndew hadien ba twa khyndew hynnin ka miet sngi Balang.
Ka jingtwa katei ka khyndew kadei namar ba kala don ka jingslap jur ha ka nongbah Shillong kaba la wanrah ia ka jingshongsynjor ia ka khyndew bad pynlong syndon ia katei ka kynroh maw ban twa kynsan.
Kane ka kynroh kaba twa kadei kaba don marjan bad ka Hotel Heiga bad baroh ki maw bad khyndew kila hap lut sha ka surok bah hapdeng ka Malki bad Dhankheti.
Ki kali puh shilum kila bunkam baroh shi miet bad khat iaka khyndew bad iaki maw khnang ba ki kali kin ioh iaid biang na kane ka surokbah.
Ki bor pyniaid District namar ka jingsakhi ba ka iing jong u Dr ML Deb kala shong synjor bad ka don jingma, ba ka khyndew ka lah ban twa biang na ka jingslap kumta kila bthah ia ki arngut kiba shong basah ha kane ka iing ba kin mih noh ha ka miet jong ka sngi Balang ban lait na kano kano ka jingma bad jingmynsaw.
Ia kane ka bynta kaba twa ka khyndew la sop noh da ka tarpaulin khnang ba kan iada na u u slap.
Pule lang ia kane: Thung u DC ia ka Magisterial Inquiry ba twa ka kynroh jong ka PA Sangma Stadium
