Shillong, Jylliew 20 : U Chief Executive Member (CEM) ba thymmai ka KHADC Bah Pyniaid Sing Syiem hynne ka sngi Ba-ar, ula phah ia ka jingmaham kaba tyngeh pyrshah ia kito ki bar Jylla kiba khaii beain khlem ka Trading Licence hapoh u pud u sam jong ka Council.
“Nga kwah ban phah ia ka jingmaham ba tyngeh sha ki bar jylla ba kim dei ban khmih lynti ba ki lah ban pyniaid ia ki kam khaii jong ki hapoh u pud u sam ka Council khlem ka Trading Licence. Ngin iai bteng ban talasi pyrshah ia ka jingkhaii beain kat kum ki kyndon jong ka Trading by Non-Tribal Regulation Act. Ngin khang khyrdep ia ki dukan ba beain” ong u Bah Pyniaid haba iakren bad ki nongthoh khubor.
Ula ong ruh ba ki nongthaw jong kane ka Ain kila wanrah ia ki kyndon kiba khlain ban iada ia ka kamai ka kajih bad ka jakpoh jong ki trai paid riewlum ka Jylla.
Une u CEM ba thymmai ula ong ba ka EC kan sa shim ia ka rai ba khatduh la kan dang ai Trading Licence ne em sha kito kiba la phah ia ki application.
Ha kajuh ka por, u Bah Pyniaid ula pyntop ba kane ka EC ba thymmai ban nym ai NOC satia na ka bynta ban shna lynti rel ha Ri-lum Khasi bad ong “Ka nongrim jong ngi kala shai bha halor kane ka kam”.
Lah ban kdew hangne ba ki kynhun Sengbhalang bapher bapher kila pyrshah ia ka jingwanrah lynti rel sha Jylla katba kam pat don ka ain ka ban the pyrrkhing ia ka jingrung kyrthep ki bar jylla shapoh ka Jylla.
Ia ka lynti rel hi, ka nongrim jong ngi kala shai kdar ba ngin nym ai NOC.
Pule lang ia kane: Iehnoh kam u Bah Alvin kum u Dy Chairman ban ai shuki ia ka Congress
