Thalain tyngeh ka CCORMAU ia u CMD ka MeECL ba kyntait ban iakynduh

Shillong, Jylliew 14 : Ka Coordination Committee of Registered MeECL (Employees) Associations and Unions (CCORMAU) hynne ka sngi Balang, kala thalain tyngeh ia u Chairman-cum-Managing Director ka MeECL Sanjay Goyal halor ka jingkynnoh ba ula kyntait ban iakynduh ia ka kynhun ki Nongialam ka Union.

U Vice President ka CCORMAU Bah Arju Dkhar haba iakren bad ki nongthoh khubor ula ong ba ka Union kala leit ban pynpaw ia ka jingpyrshah hakhmat u Myntri ka Tnad bording Abu Taher Mondal halor kane ka kam u CMD.

“ Ngi la pyrshang ban iakynduh ia u CMD hynrei ula kiar khnang na ngi bad ka long kaba sngew diaw namar kum u khlieh pyniaid bad kum ka synjuk, ban jam shakhmat hi phi donkam ia ka jingshaniah mar kylliang. Namar kata, hynne ka step, ngi la leit ban pynpaw ia ka jingpyrshah hakhmat u Myntri” ong u Bah Arju.

U pyntip ba ki Nongtrei ka MeECL kin dang ban ioh ia ka tulop jong u bnai Jymmang.

“Ngi la dep ai notice sha ki borkhmih ba dei ban siew ia ka tulop jong ngi hapoh ka 10 tarik manla u bnai. Ngi la dei ban pynlong ia ka jingiakhih ha ka 12 tarik hynrei u CMD ula phah ia ka shithi sha ngi ha ka 8 tarik bad ula khot ia ngi sha ka jingialang mynta ka sngi pynban shu kynsan kynsan tang shiteng kynta shuwa ka jingialang, ula pynsangeh noh ia ka jingialang bad ngi la sngewmong haduh katta katta halor kane ka jingleh jong u” bynrap u Bah Arju.

Haba pynpaw ba kam shym don satia kano kano ka jingiarap ia ngi mynta halor kane ka kam, une u Vice President ula ong “Hynrei ha ki sngi ban sa wan, ngi iohi baka don ka jingkyrmen namar ngi iohi ia ka mon treikam jong u Myntri bad nangne shakhmat, ngin sa nang iakren kham bun bad u Myntri”.

U pyntip ba ka Kynhun kala iakren ruh halor ka jingtreikam jong ki kor ki bor ka MeECL, ka jingduna bording, ka jingthiede bording, ka dor bai bording ba hap siew ki nongpyndonkam bording, ki karkhana bad ka rukom treikam jong ka Regulatory Commission.