Shillong, Jylliew 14 : Ka Tnad Animal Husbandry & Veterinary ka pyntip ba ka Ri-lum Khasi bad Jaintia, ki dei kiba shah ktah jur eh ha ka jingpang sniehdoh ki masi bala tip kum ka Lumpy Skin Disease (LSD).
Kala pyntip ruh ba ka jingsaphriang jong kane ka jingpang ha ki masi kala kham duna mynta bad ka Tnad ka dang peit ngot bha ban tehlalam ia ka jingsaphriang.
U Dr P Blah War, Assistant Director ka AH &V (Disease Investigation) ula pyntip ba kat kum ki jingtip ba u ioh, ka jingsa phriang jong ka PSD kala nang kham duna haba ianujor ha kine ki khyndiat sngi bala leit noh. Ula ong ba ka Tnad kala trei borbah ruh ban khanglad ia ka jingsaphriang jong ka jingpang.
Kat kum ka jingong une u Doktor, ka tnad kala buh haduh 168 tylli ki kynhun Rapid Response Team ban peitngor ia ka jing saphriang ka LSD haba pyntip ba haduh mynta, kam pat don satia ka lad ban pynkoit ia kane ka jingpang.
Ka Ri-lum Khasi bad Jaintia ki dei kiba shah ktah jur bha ha kane ka jingpang masi bad ki district kiba shah ktah ki kynthup ia ka Ri-Bhoi, East Khasi Hills, South West Khasi Hills bad West Jaintia Hills.
Kat haduh hynnin ka sngi Ba-ar, ka jingiap jong ki masi na ka jingpang LSC kala kot haduh 45 tylli bad kiba bun na kine ki dei na West Jaintia Hills.
U Dr Blah ula ong ruh ba ka jingbam ia ka doh masi bad ka jingdih ia ka dud kan ym ktah satia ia ka koit ka khiah jong ki briew. Hynrei, kalong kaba donkam pat ban da shet bha ia ka dud ne ka doh hashuwa ban iabam ne iadih.
Ha kajuh ka por, une u Doktor ula pyntip ba ka jingpang African Swine Flu jong ki sniang ruh, kala nang hiar bad kam shym la don shuh ka jingiap ki sniang naduh ka 2 tarik u Jylliew.
