Shillong, Jylliew 13 : U Managing Director ka Meghalaya Energy Corporation Limited (MeECL) Sanjay Goyal, hynne ka sngi Ba-ar ula pyntip ba ka Tnad kan sa nang khate ia ki kynta pynlip bording ha Jylla lada u slap u dang iai bteng ban hap ha kine ki sngi ban wan.
“Lada ka jingioh slap ka dang iai bteng ha kine ki sngi ban wan bad ngi la pahun ha ka jingdon um ha ki dam, khlem pep ngin pyrshang ban khate noh ia ki kynta pynlip bording khamtam ha ki kynta ba donkam bording eh” ong u Goyal haba iakren bad ki nongthoh khubor.
Ula ong ba ka Jylla kala ioh slap ha kine ki lai-saw sngi bala leit noh bad ka jingdon ka um ha pung Umiam kala kiew da 6-7 phut.
“Ngi dei ban kynmaw ba ka um ha Umiam kala hiar sha u pud ka bym pat kot ha kine ki shiphew snem bala leit noh. Hynrei ka jingdon ka um mynta ruh kam pat long kaba ishngain bad …lada ngim ioh slap biang ha kine ki sngi kumba ngi donkam, kane ka um ba don mynta ka lah ban nym pat dap satia ban pynmih bording tang ha ki 10-11 sngi” ong u Goyal.
Haba pynpaw ba ka MeECL kala pynbeit mynta ban ioh bording na ka NTPC, u Goyal ula ong “Ngi la thied kat kaba ioh ka bording na ki iew ban lah pynneh ia ki kynta pynlip bording kumba long mynta”.
U pyntip ba ha kine ki 3-4 sngi, ka MeECL kam shym la pynlip bording satia ha ka por mynsngi namar ka jingioh bording ne lah pynmih bording na ki hydro project kum ka Leshka hadien ka jingioh ia u slap.
Haba kylli halor ka Ganol power project, u Goyal ula ong ba mynta bala ioh um lap, kawei ka unit kala sdang ban treikam. “Ngi la buh ia ka thong ban gin lah ban pyntreikam noh ia baroh lai tylli ki Unit hapoh ka shibnai” ula bynrap.
Pule lang ia kane: MSL 2023 : Wanphai ka Khliehmawlieh bad Rangdajied United na ka jingshah rem sha ka jingioh rung phainal
