Shillong, Jylliew 13 : Ki Pulit ka Nongbah Shillong hynnin ka sngi Nyngkong, kila lap ia ka samla lud kaba jah rngai mynta la 10 sngi na skul St Margareth, Laitumkhrah ha kawei ka jaka kaba don ha West Bengal.
Kane ka samla lud kaba la 17 snem ka rta, ka dei kaba shong ba sah ha Upper Mawprem. Kane ka samla kala jah rngai naduh ka 2 tarik Jylliew 2023 napoh ka skul St Margareth, pyntip u Superintendent of Police ka East Khasi Hills.
Kat kum ka jingong jong u, ki Pulit ka Laitumkhrah Police Station kila register case halor kane ka jingjia hapoh ka kyndon 363 IPC bad kila pynlong ia ka jingtohkit ba khlem shongthait ban lapdien ia kane ka khynnah.
U pyntip ba ki Pulit kila ioh ksai halor kane jingjia bad ki Pulit ka East Khasi Hills hapoh ka jingialam u Sub Inspector Md Kayum, kila hiar sha West Bengal ban wad ia kane ka Khynnah.
U iathuh ba dei ha ka 12 tarik Jylliew ba ki Pulit kila lap ia kane ka samla lud na ka sor Malda, West Bengal.
Ki Pulit kila wan ialam noh ia kane ka samla sha Shillong bad la aiti noh ia ka sha ki bahaiing.
