Shillong, Jylliew 13 : Ka Meghalaya State League-2023 kala sakhi ia ka jingiakhun kaba itynnad bha ym tang ha kawei ka jingiakhun hynrei ha baroh artylli ki semi-phainal second leg ha kaba la iohi ba ka Khliehmawlieh Youth Club bad ka Rangdajied United Football Club kila lah ban wanphai pat na ka jingshah rem ha ka 1st leg ban long ki kynhun kiba rung sha ka phainal jong ka lympung.
Ha Shillong, ka Khliehmawlieh kaba la shah rem da 1-0 kol ha ka 1st leg, kala lah ban pynphai kylla bad ioh thep haduh 3-1 kol ha ka second leg ( 3-2 aggregate) ha ka jingiakhun ha SSA Stadium ban rung sha phainal.
Ka Rangdajied ka dei kaba hap iakhun tyngeh da ka jingliem haduh 3-0 kol ha ka 1st leg pyrshah ia ka Shillong Lajong bad hyne ka sngi, kala lah ban pynphai da ka jingioh thep haduh 3-0 kol ha ka jingialehkai ba long ha madan MDSA, Mawkyrwat. Kine ki arkynhun kila iakhaid mar 3-3 kol ha ka aggregate hynrei ha ka jingiakhun penalty, ka Rangdajied kala jop da 4-3 kol ban rung sha ka phainal.
Kine ki jingiakhun kin dei kiba itynnad tam ba la pynialehkai ha ka Meghalaya State Leaque ha baroh artylli ki samoi ialehkai bad ka Khliehmawlieh bad ka Rangdajied kin ioh shongthait tang katto katne sngi shuwa ba kin iamih madan ban iakhun ha ka phainal ka ban long ha madan SSA, Shillong ha ka sngi Saitjain.
Ha ka jingiakhun hapdeng ka Mawlai Sports Club bad ka Khliehmawlieh, la iohi kumba ka Mawlai ka pyniaid ia ka jingialehkai bad kala ioh ban thep ia ka kol ba nyngkong lyngba u samla Donlad Diengdoh ha ka minit ba 33, kaba pyntam ia ka Mawlai da 2-0 kol ha ka aggregate.
Ka Khliehmawlieh kala iakhun tyngeh ban pynphai ia ka kol bad da ki jingmih ki jingbakla ha ki rang ialehkai ba shadien ka Mawlai, u samla Mainingstar Marngar ula ioh ka lad ban pynphai ia ka kol ha ka minit ba 45+1 jong ka kylla step.
Ka jingialehkai jong ka kylla miet kala nang shongshit ha kaba ki rang ialehkai na baroh arliang kila iasei lut ia ki sap bad ka bor ka sor hynrei ka jingiakhun dohiap jong ki rang ialehkai ka Khliehmawlieh, kala wanrah ia u soh da ka jingioh ban thep ia ka kol kaba ar lyngba u samla Livingstone Nongrang.
Ka Mawlai kala ioh ka lad ban tam biang ia ka jingthep kol lyngba ka penalty ba kala ioh na ka jingbakla brut jong u rang ialehkai ka Khliehmawlieh hapoh ka penalty box. U Captain ka Mawlai samla Brolington Warlarpih ula shim ia ka bynta ban shut ia ka bol hynrei kane ka bol kala iaid nalor u nar kol.
Katba ka por nang jan sha kaba kut, ka Mawlai kala iakhun katba lah ban tur shakhmat hynrei khlem da poi pyrkhat, u samla Livingstone Nongrang ula ioh rung na ka liang ka mon bad da ka jingiarap ba u ioh sha ka liang ka diang, une u samla ula shit ia ka bol sha u Chalieu hashuwa ban ai sha u Kyntiew Myrthong (90) minit ba un shut ia ka bol ha ka kol kaba thylli, bad pynlong ia ka kynhun ban tam da 3-1 kol.
Ha Mawkyrwat, ka jingjop jong ka Rangdajied ka dei kaba khraw bha khamtam ia ka Shillong Lajong kaba dei ka club ba pawnam bha bad kaba dang shu kiew shen sha ka lympung ialehkai I-Leaque. Ha kaba kut, ki lai tylli ki kol bala thep hapoh ka 90 minit ki dei kiba la thep da ki rang ialehkai barim ka SLFC ba kynthup ia u Tremiki Lamurong (32,73) bad u substitute Batskhem Thangkhiew (56).
Kane ka jingiakhun kala poi sha ka jingiashut penalty bad ki riew ieid phutbol kila kynmaw ia ka jingjop jong ka Lajong pyrshah ia ka Rangdajied ha ka MSL-2019 lyngba ka penalty ban ioh rah ia ka nam lahduh. Hynrei ka jingiakhun hynne ka sngi Ba-ar kala kylla bad ka Rangdajied kala ioh khur ia ka jingjop da 4-3 kol.
Ka MSL-2023 kan sa ioh mynta ia ka Champion ba thymmai kaba lah ban long ka Khliehmawlieh ne ka Rangdajied, ki ban sa iakhun ia ka phainal ha ka sngi Saitjain ha Shillong.
