Shillong, Jylliew 12: Ka Khasi Students’ Union (KSU) ka pynpaw ïa ka jingsngewsih bad jingsngewlem kaba khraw halor ka jingkhlad noh jong u samla rangbah Wanlambok Kharsati ha ka 11 tarik mynta u bnai.
Ka seng ka kdew ba u samla rangbah Wanlambok Kharsati (Bam Kwai Dwar U Blei) ula iasoh nyngkong eh sha ka KSU ha u snem 2003 kum u Publicity Secretary ka Mawryngkneng Circle bad hadien ba u la bat kum u Publicity Secretary u la shah pynkhamti kum u General Secretary bad dei hangne u la pyni shisha ia ka kam ba khraw jong u kum uta u nongialam bad dei ha u snem 2009 u la shimti pura kum u nongialam ba rangbah (president) jong ka KSU Mawryngkneng circle.
U samla Wanlambok hadien ba u la Pule ia ka MSc Chemistry hapoh ka Skul bah NEHU u la shimti ruh kum u President ka KSU NEHU ban ialam ia ka kynhun ki samla pule Khasi ha katei ka por bad kum u nongialam jong ka KSU NEHU Unit u la trei bor bah ban ioh pynrung klas ia ki Samla khasi.
“Ka matti kaba ngim lah ban klet ia u samla Wanlambok ha kane ka por ka long ba hapoh ka jingialam jong u, ka KSU la lah ban ia khun da ka bor jabieng pyrshah ia ki bor pyniaid ka Skul bah NEHU ba ia ki Hostel ba la tei thymmai la ai nam sha ka Kyrteng Khasi bad kane ka la long kaba jop.” la ong ka kyrwoh ka KSU CEC.
Ia u samla Wanlambok la pynrung dkhot hapoh ka KSU Central Executive Council ha u snem 2008 hapoh ka jingialam jong u bah Samuel B. Jyrwa kum u President bad bah Hamletson Dohling kum u General Secretary bad ula neh kum u dkhot pura tad haduh ba un da shongthait na ka seng ha u snem 2017.
“Kum ka seng ngi dang sngew kit-ram da shisha ban duh kloi noh kum ia une u rangphawar uba ju kren beit ia ka hok bad ka jingshisha na bynta ka bit ka biang u paid shi tyllup ka Ri u Laiphew Syiem Khad Ar Daloi” la ong ka kyrwoh.
Ka kyrwoh ka ong “Bah Wanlam, ki symboh ummat sngewnguh kim shym pat biang ban pyn iahap tara ryngkat ki rngi ba tyngshaiñ tam ba phi la noh ha ki mawjam ka jingim jong phi, u bym lut ne jah noh na u thiar ka khana pateng ka jaidbynriew, ia u ba phi la sdang la ialam bad buh ha ngi ki longdien, ki symbai ba phi la bet kin nang iai ithuh paw bad iai saiñdur bad tyngshaiñ ha ki syrdeng ki tympan sur pring jong ki lyngwiar jingieid pynsyaid mynsiem ki Rympei khasi”
 ka pynpaw ïa ka jingsngewsih bad jingsngewlem kaba khraw halor ka jingkhlad noh jong u samla rangbah Wanlambok Kharsati ha ka 11 tarik mynta u bnai.){kind=link}