Imphal, Jylliew 10: U Myntri Rangbah ka Assam bad Convener ka NEDA Himatan Biswa Sarma, hynne ka sngi Saitjain ula leit iuhkjat ha Manipur bad iakynduh ia u Myntri Rangbah ka Manipur N Biren Singh, ban iasyllok halor ka jinglong jingman ka suk ka sain ha kane ka Jylla ka thain Shatei Lam Mihngi kaba don hapdeng ka thma iapher jaidbynriew.
Ka jingiakynduh ka long eh halor ka jingiasyllok ia ki lad ki lynti kumno ban wanrah pat ia ka jingsuk bad ka jinglong jai jai ha Manipur. Baroh arngut ki Myntri Rangbah kila pynpaw ia ka jingdiaw halor ka jinglong jingman ha kane ka Jylla.
U N Biren Singh ula batai bniah ia u Himanta halor ki jingeh kiba la wan lynshop ha Jylla naduh ka 3 tarik Jymmang, 2023. Ka jingia umsnam hapdeng ki Hindu Meitei bad ki paid Kuki kiba dei ki Khristan, kala mih hadien ka rally jong ka All Tribal Students Union ka Manipur, kaba long ha ka 3 tarik Jymmang.
Ka jingia umsnam kala neh mynta la palat shibnai ha kane ka Jylla bad ka Sorkar Pdeng kala phah ia ki bor shipai ban teh lakam ia ka jinglong jingman baroh.
Ha ka sngi Thohdieng, ka Iingkashari Supreme Court kala kyntait ban shong bishatr ia ka jingmudui pyrshah ia ka hukum ba khang ia ka kor Internet hapoh ka Jylla haba pynpaw ba ka High Court kan sa bishar ia kane ka kam.
Ha kawei ka liang, ka Kynhun tohkit ba lai ngut jong ka Sorkar Pdeng, kala poi ha Manipur hynnin ka 9 tarik, ban tohkit ia ki daw bad ka jingsaphriang ka jingiakynad pher jaidbynriew ha kane ka Jylla.
