Shillong, Naitung 07: Ka Khasi Hills Autonomous District Council (KHADC) hynne ka sngi palei, kala rai ban dawa pyllait noh ia ka jingtih ia ki minor mineral (shyiap, maw, mawshun, slate, mawlein etc) na ka Meghalaya Minor Minerals Concession Rules (MMMCR), 2016.
Haba jubab ia ka motion bala wanrah da u MDC ka Congress na Mylliem Bah Ronnie V Lyngdoh halor ka jingkhang ia ka jingtih shyiap bad tih maw, u Chief Executive Member ka KHADC Bah Titosstarwell Chyne ula pyntip b aula dep ai jingthoh sha u Myntri Rangbah ka Jylla Conrad Kongkal Sangma ha ka 19 tarik Jymmang ba kyrpad ba un tuklar lem halor ka jingpynkylla thymmai ia ki kyndon ka MMMCR Rules, 2016.
“Ka Executive Committee (EC) kan sa buddien ia kane ka kam bad kan sa ai jingmut ia ka Sorkar Jylla ba kan kham pynjynsur noh ia ka Rules da kaba pyllait ia ka jingtih ia kine ki mar (minor minerals) kumba ju ia tih naduh mynshuwa naka MMMCR, 2016” ula ong.
Kat kum ka jingong jong u, ka MMMCR ka dei ka Rule kaba mih na ka Mines and Mineral (Development and Regulation), Act 1957 , kaba khang ia ka jingtih ia u shyiap bad u maw khlem da ioh ia ka permit. Ka MMDC Act, 1957 ka dei kaba treikam ruh ha ki jaka kiba hap hapoh ka Sixth Schedule.
U Bah Titos ula pyntip b aka National Green Tribunal (NGT), kala rai ban khang ia ka jingtih shyiap bad jingtih maw bad ka Tnad Khlaw ka Jylla bad ka Deputy Commissoner ruh kila pynmih ia kiba bun ki hukum ban khang ia kine ki kam kaba la ktah jur ia ki nongshongshnong jong ka Jylla.
Ha ka 27 tarik Jylliew, ka Kynhun Myntri ka Sorkar Jylla kala mynjur ban pynkylla noh ia ki katto katne ki kyndon jong ka MMMCR, 2016.
U Myntri Rangbah ka Jylla Conrad Kongkal Sangma ula ong, namar ka jingbym long shai bad ka jingdon ki katto katne ki kyndon, ka jingai jingbit ia ka kam tih shyiap kam dei kaba la ai bor sha ki Tnad bapher bapher jong ka Sorkar Jylla.
“Mynta da kane ka rai bala shim, kala don ka jingshai bad ka jingai ia ki mining licence lane lease sha kino kino kiba kwah tih syiap na ki wah, kin sa ioh ia ka jingbit kat kum kane ka jingpynkylla ia ka Rule” ula ong.
U Bah Titos ula ong, hynrei ka Sorkar Jylla kam pat iakren eiei ruh em haba iadei bad ka jingtih maw hapoh ka Jylla.
“Hynrei ngi khlem iakren ia ka jingtih maw, ngi iakren halor ka rukom tih kaba iaid naduh mynshuwa bad ka jingdonkam ban pynneh pynsah ia ka” ula ong haba bynrap “Ta ka daw, ailad ia ka EC ba kan buddien ia kane ka kam khnang b aka Sorkar Jylla kan lah ban leh ia kaba donkam na ka bynta ka bha ka miat jong kito ki briew kiba shaniah ia ka kamai jakpoh na kane ka kam”.
Haba wanrah ia kane ka Motion, u Bah Ronnie ula ong ba ka jingkhang ia ka kam tih shyiap bad tih maw kam shym la ktah tang ia ka kamai jakpoh jong ki paid riewlum trai muluk hynrei kala ktah wat ia ka jingpyntreikam ia ka skhim MGNERS hapoh ka Jylla.
Ula dawa ia ka Executive Committee ba kan iakren bad ka Sorkar Jylla halor ka jingdonkam ban pynjynsur ia ka Rules kabym don jingktah ia kiba riewspah kiba don bun bah ka jaka hynrei kaba ktah pat ia ki briew kiba trei ia kane ka kam ha ki jaka kiba rit.
Une u MDC ula maham ruh ba kane ka jingkhang kan sa ktah suki suki ia ki kam pynroi jong ki Tnad Sorkar bapher bapher namar ka jingbym lah shuh ban ioh ia kine ki mar kiba donkam ha ki jingtei bapher bapher.
“Nga sngewthuh b aka jingkhang ka dei naka bynta ban iada ia ka mariang hynrei ngam lah ban sngewthuh pat b aka jing khaii tuh ia u dewiong ka dang iaid shaid shaid. Nga shu kwah ban tip la ka jingtih dewiong kam ktah mo ia ka mariang” buh jingkylli u Bah Ronnie.
