Delhi, Jylliew 05 : Ki paidbah na ka Jaidbynriew Meitei kila pynlong ia ka jingiakhih da kaba shong kyllain mungor hynnin ka sngi U Blei ha Jantar Mantar, Delhi, ban pynpaw ia ka jingpyrshah halor ki kam iaumsnam kiba mih na ka thma iapher Jaidbynriew ha jylla Manipur.
Ki paid Meitei kila dawa ruh ia ki lad jingiada na ki kaikhlaw Kuki, ia kiba dei bankynnoh halor ka jinglong jingman ha kane ka Jylla.
Kila kyntu ruh ia ka Sorkar ba kan tehlakam ia ka jingwan rung kyrthep ki mynder hapoh ka Jylla bad ban iada ia ka jingia long kawei jong ka Jylla.
Ia kane ka jingiakhih la pyniaid da ka Manipur Coordination Committee bad da ki spah ngut ki briew na ka jaidbynriew Meitei kiba don ha Delhi, kila iashimbynta ha kane ka jingakhih.
La pynsdang ia kane ka jingshong kyllain mungor da ka jingiaid rally ha kaba la iapyrta slogan “Save Manipur” bad “ Kuki terrorist go back were heard”.
Ki nongiakhih ki long ba watla u Myntri kam Pohiing ka Ri ula leit ban iuhkjat ha Jylla, ka Jaidbynriew Meitei kam pat sngew shngain satia ha Manipurnamar ki bor Sorkar bad ki bor pahara kim shym la lah satia ban ai jingiada ia ki.
Kine ki nongiakhih kila ong ba ka rally kam dei satia ban pynlong sohpdung ia ki jaidbynriew Kuki hynrei ka long na ka bynta ban pyrshah ia ki kaikhlaw Kuki kiba la leh ia ki kam pyntriem da kaba pynkhein ia ka soskular Suspension of Operation (SoO) bad ka Sorkar.
