Shillong, Naitung 06: Ka United Democratic Party (UDP) hynne ka sngi balang, kala pynbna ia ka kyrteng u Dr Aman War, u Director ka Health Services (MI) bala shongthait, kum u kyrtong ka Party na North Shillong Constituency ha ka elekshon MLA ban long ha Jylla ha u snem 2023.
Ia u Dr Aman War la pdiang sngewbha da u President ka UDP bad Lamphang ka Iingdorbar Bah Metbah Lyngdoh ha ka jing ialang bala pynlong ha Khasi National Durbar Hall, Mawkhar ha ka jingiadonlang ki MLA bad ki Nongialam ka party.
Haba kren ha ka jingialang, u Bah Metbah ula kyntu ia ki paidbah ka North Shillong ba kin ai ia ka jingkyrshan kaba pura ia u Dr Aman kum u kyrtong ka UDP.
“Da ka jingkyrshan kaba ngi ioh mynta, ngam don jingartatien ba ka party kan lah ban leh bha ruh ym tang ha North Shillong Constituency hynrei ha baroh kawei ka Ri-lum Khasi-Jaintia bad Ri-lum Garo” ula ong.
U Bah Metbah ula pyntip baka UDP kan sa pynieng kyrtong ruh ha Ri-lum Garo haba pynpaw ia ka jingsngewskhem ba ka party kan tam ia ka jingioh MLA ba palat ia ka 30 ngut ha ka elekshon 2023.
Une u Hehduh ka UDP ula pyntip ba bun ki MLA ba mynta kiba dei na kiwei kiwei ki Party kila pynpaw ia ka jingkwah ba kin wan iakhun noh na ka UDP ha ka elekshon ban wan.
Ka UDP kumba ka long mynta, ka don tang 8 ngut ki MLA ha ka Iingdorbar thaw-ain ka Jylla kaba don 60 ngut ki MLA.
Haba ai jingkren, u Dr Aman ula ong ba ki don ki briew kiba la pynpaw ia ka jingsngew ba nga la rung slem palat sha ka jylli sain hima sima namar ba nga la dap 58 snem ka rta bad ba dang shu shongthait na ka kam.
“Hynrei nga kwah ban ai jubab sha ki da kaba ong ba watla nga la kynjoh 58 snem ka rta hynrei nga dang sngew kum u samla ba 27 snem bad da ka jingshemphang jong ka ban trei ban trei mynta la 37 snem, nga kular ha phi ba ngan trei shitom ha kaban pynthikna ba ka jingangnud jong ki paidbah ka North Shillong kan urlong shisha” ula bynrap.
U Dr Aman War ula ong ba lyer jong ka jingkylla ka dei ban sdang na kane ka Constituency (North Shillong). Kane ka sngi ka dei ruh ka sngi ba pynkha ia ka APHLC, kawei na ki seng sain pyrthei riewlum ka Jylla.
Haba pynkynmaw ia u syniang jong ka APHLC, u Dr Aman ula ong “Watla ngi kynmaw burom ia kaba la leit noh, hynrei kala dei ka por ban jam shakhmat, ban iatreilang bad ialam ia ka Jylla jong ngi sha ka kyrdan ba ka dei ban kynjoh ha manla ki liang. Kam long kaba suk haba phai ia ka jinglong jingman mynta hynrei nga kular ia phi ba ngan trei khlem shongthait da ka jingkyrshan bad jingai mynsiem lem jong ki ki nongkyrshan”.
Haba kubur ba u dang khynnah eh ha ka kam sain pyrthei, une u DHS (MI) bala shongthait ula ong ba u long uba kloi bad ba kwah ban ioh ia ki jinghikai na ki Nongialam kiba tbit kiba don hapoh ka UDP.
“Nga lah ban duna ha ka jingshemphang hynrei ngan pyrshang ban kot bor da ka jingtrei shitom, jingtrei hok bad jingaiti ha ka kam” ula ong.
Shuwa kane, u Bah Metbah ula plie ruh ia ka Ophis treikam jong ka UDP-North Shillong ha Mawkhar, kaba la buh ha ka Iingkmie jong u Dr Aman War.
