Shillong, Jymmang 31: Ka Hynniewtrep Border Dispute Redressal Forum (HBDRF) hynne ka sngi kala leit buh daka dorkhas hakhmat u Chief Secretary (CS) ka jylla ba dawa ban tuklar halor ka jingshah pyndik ki Khasi-Pnar kiba sah hapoh ka thain Block 1.
Haka dorkhas, u Chairman ka HBDRF bah C Sungoh ula kynnoh ba ki jaitbynriew Karbi naka jylla Assam ki dang iai bteng ban pyndik iaki Khasi-Pnar kiba sah ha Block 1 daka ba pakhang iaki surok kiba don ha ki thain Khanduli, Man-I Umpawlang bad Mukroh ban leit sha Mookoilum, Tibin bad Inghinlangso.
U bah Sungoh ula pyntip ba kane ka jingpakhang surok ki Karbi kala pynduh iaki Khasi-Pnar ban leit sha ki jaka rep, ki iew bad kumjuh ruh ban leit shim dawai ne phah sumar.
Ula pyntip ba kane ka pakhang surok ka buh jingeh bha iaki Khasi-Pnar kiba sah haki shnong ba hap ha Block 1 bad kane ka ktah bha iaki nongrep namar kim ioh shuh ban leit die iaki mar rep namar ki iew ki don sha u pud u sam ka jylla Assam.
“Ngi kyntu iaka sorkar lyngba u Chief Secretary ba kan tuklar mar dor ia kane ka kam lehdonbor ki Karbi namar kane ka buh jingeh lut ia baroh ki nong shong shnong kiba don hapoh ka thain Block 1” la ong u bah Sungoh.
U bah Sungoh ula pyntip ruh ba watla kala don ka jingialang hapdeng ki artylli ki bor district ka jylla Meghalaya bad Assam haka 23 tarik mynta u bnai hynrei haduh mynta ki paidbah kim pat shai kaei kaba mih na kane ka jingialang bad haduh mynta ki paidbah ka thain Khanduli kim pat ioh jingthoh naka Karbi Anglong Autonomous Council (KAAC) ban weng noh iaka khyrdop kaba don hapoh kane ka shnong.
