Shillong, Jymmang 31: Ka United Democratic Party bad ka Hills State People’s Democratic Front (HSPDP) hynne ka sngi Balang, kila pynpaw ba ki kyrshan iaka jingdawa ka Voice of the People’s Party (VPP) ban thaw daka Expert Committee haba iadei bad ka bhah thungkam lane ka Reservation Policy.
Hynne ka miet ka UDP bad ka HSPDP kiba don haka Regional Democratic Alliance (RDA), kila lum kyrkieh ia ka jingialang ban pynkhlain shuh shuh iaka jingiadei paralok bad haka juh ka por ban jied thymmai iaki nongialam ka RDA.
Haba kren sha ki lad pathai khubor u MLA ka Mawkyrwat konstitwensi u bah Renikton Lyngdoh Tongkhar u ba mihkhmat iaka UDP haka jingialang jong ka Committee, ula iathuh ba haka jingialang ka UDP bad ka HSPDP kala ai jingmut iaka Committee ban wanrah noh daka Office Memorandum (OM) ba thymmai bad ban pynduh noh iaka OM bala pynmih haka 10 tarik Jymmang 2022.
U bah Renikton ula iathuh baka jingai jingmut ban pynduh iaka OM jong u snem 2022 kadei namar ba ha kane ka OM (2022) la bthah ba iaka Roster System dei ban pyntreikam naduh 1972 bad naka liang ka UDP bad HSPDP kila ban jur ba iaka Roster dei ban pyntreikam nangne shakhmat ym ban kyrtiang dien.
“Kila don shibun ki jingai jingmut hynrei kawei ka rai kaba ka UDP bad ka HSPDP kila mynjur kadei ban thoh shaka sorkar jylla ba kan thaw daka Expert Committee haba iadei bad ka jingdawa bishar biang iaka bhah thungkam lane ka Reservation Policy ka jylla” ong u bah Renik.
Naka liang u General Secretary ka UDP bah Allantry Dkhar ula iathuh ba ka UDP ka ieng haka nongrim ban trei naka bynta ka bha ka miat jong baroh ki trai jylla Meghalaya bad haka juh ka por ka Party kala ai jingmut ruh baka Reservation kadei ban peit bha ruh iaki ba dang sahdien la kidei naka Khasi-Jaintia ne Garo.
U bah Allantry ula kyntu iaka sorkar ba kadei ban shimkhia noh haba iadei bad ka jingai jingmut ban thaw noh daka Expert Committee haba iadei bad ka jingdawa bishar biang iaka bhah thungkam lane ka Reservation Policy.
