Shillong Jymmang 30: Ka Khasi Jaintia Church Leaders Forum (KJCLF) hynne ka sngi ka la kyrpad ia ka sorkar bad ki bor ba dei peit ba ki dei ban pynbeit noh kloi kloi katba lah ia ka jingdawa bishar biang iaka Reservation Policy.
Ka kyrwoh na u secretary ka KJCLF u Rev. Dr. Edwin H Kharkongor ka kdew ba dang shen ka KJCLF kala iaphylliew jingmut halor ka jinglong jingman ka suk ka sain bad ka la sngewkhia ia ka jinglong jingman ha kine ki sngi.
“Ngi sngew ba kum ki nongialam Khristan dei ban don ka jingsngewthuh ia ka ain bad ban lah ban pynsngewthuh ia ki riewngeit halor ki mat kiba ktah ia ki kam bad ki jingleh ha ka jingngeit jongki bad kumjuh ia ki mat ba ktah ia ka imlang sahlang. Ngi kyntu ia ki nongialam Balang bad ki shlem ban pynlong ia ka jingai jinghikai halor kine ki mat na ka por sha ka por” la ong ka kyrwoh.
U Rev. Dr. Edwin H Kharkongor ula ong “Na bynta ki samla mynta bad ka pateng ban wan, ka long kaba don burom ban pynbeit ia kane ka jingbakla, kaba la shu ieh kumto bad khlem kano kano ka jingpynsngap bad ka jingkhim jingmut ha ki por ba la leit bad kumjuh jong kiba don ha ka bor ba mynta. Namarkata, ngi kyrpad ia ka sorkar bad ki bor ba dei peit, ban pynbeit ia kane kloi katba lah”.
Ka KJCLF ka la kyntu ia ki Khristan ka thain ban duwai lem ba ka jingsuk kan wan phai biang ha jylla Manipur bad ban iarap kyrkieh ia kiba shah ktah ha ka jingiakynad.
