Tura, Jymmang 29 : Ki Sengbhalang ba paw ka Ri-lum Garo kila rai lang ban kyntait ia ka jingkhot jong ka Sorkar ban iakren halor ka Reservation Roster haba dawa ruh ia ka Sorkar Jylla ba kam dei ban pynkhih ia ka jingsam bhah jong ka State Reservation Policy.
Kine ki Sengbhalang ki kynthup ia ka Garo Students’ Union (GSU)- CEC, Garoland State Movement Committee (GSMC), A.chik Youth Federation William Nagar (AAYF), AAYWS bad kiwei kiwei. Ia kane ka rai la shim ha ka jingialang ba long hynne ka sngi Nyngkong ha Tura, kaba iatai halor ka jinglong jingman halor ka Roster System hapoh ka Jylla.
“Ngi ki sengbhalang ka Ri-lum Garo ngi la iashimlang ia ka rai ban nym leit iashimbynta ha ka jingialang ban iakren halor ka Roster System, kaba la buh ban long ha Shillong bad ka ban pyniaid da u Myntri Rangbah ka Jylla Conrad K Sangma” ong ka kyrwoh na kine ki seng.
Kine ki Sengbhalang kila pynbna ruh ba ka State Job Reservation Policy ha Jylla kam dei satia ban don kano kano ka jingpynkylla. Kila iengskhem ha ka nongrim bay m dei ban leh shiliang ha ka jingthungkam kat kum ka Roster la ka dei kaba treikam naduh ki snem bala leit noh ne nangne shakhmat.
Kine ki Seng kila dawa ruh ban kynthup lang ia ki jingbym lah pyndap ia ka jingiohkam ki paid Garo ha ki snem bala leit (backlog) haba ban jur ban iaid kat kum ki jingkhein jingdiah kiba paka.
Kine ki Seng kila pynpaw ruh ia ka jingkut jingmut ban ieng iada pura ia ka hok bad ka bha ka miat jong ka Jaidbynriew ba ki mihkhmat. Kila kren da kaba shai kdar ba lada donkam, kin ym artatien ban pynlong ia ki jingiakhih bapher bapher ban pynthikna ia ka jingpyntreikam ba khlem shah liang ia ka Reservation Roster System.
“Ngi kren da kaba shai, lada donkam, ngin pynlong da ki jingiakhih bapher bapher khlem ka jingartatien ha kaban pyntikna ba kan don ka jingleh hok haba pyntreikam ia ka Reservation Roster System” kila ong.
