Shillong, Jymmang 25: Ka Sorkar Meghalaya Democratic Alliance (MDA) hynne ka sngi Palei, kala khot ia u President ka VPP bad MLA ka Nongkrem Bah Ardent M Basaiawmoit ban wan sha ka miej iakren hadien ba ka jingiakhih shah jingit jong u ban dawa bishar biang ia ka Reservation Policy kala jam sha ka sngi kaba lai.
Kane ka jingkhot kala mih na ka nongaiktien ka Sorkar Jylla bad Myntri ka Koit ka Khiah Kong Ampareen Lyngdoh, kaba la kyntu ia u bah Ardent Miller Basaiawmoit ban sangeh noh ka jingshah tngan bad ban wan sha ka miej ban iakren halor ki mat jing dawa jong u.
“Nga kyntu ia u MLA ka Nongkrem naka Voice of the People’s Party (VPP) ban wan shaka miej iakren halor ki mat jingdawa ba u don, ngam lah ban kular ban pynurlong lut iaki jingdawa ba u don hynrei nga donkam ban sngewthuh shai shwa, kiei ki mat jingdawa ba u don” la ong ka kong Ampareen.
Ka kong Ampareen kala ong ba lada u bah Ardent u weng noh iaka jingiakhih shah thngan kan long ka jingbha ia baroh bad kan plie ruh ka lad ban iashong jingialang bad ban iathir iaki mat jingdawa bad ban iathir kumno ban iaid shakhmat khlem da pynmong ia kano kano ka jaitbynriew.
Kala ong “Ngi dei ki nong Meghalaya bad ngi don lai tylli ki jaitbynriew bad ngi kwah ban iada iaka bha ka mait jong baroh”. “Sngewbha bah Ardent wan shaka meij ban iakren” kala ong.
