Shillong, Jymmang 25: Ka Woodland Institute of Nursing (WIN) hynne ka sngi Palei, kala pynlong iaka Convocation kaba nyngkong eh da ka jing pynkup burom ia 116 ngut ki samla kiba la pyndep ia ka jingpule nos ha ka jingialang kaba la pynlong ha Laitkor, Shillong.
Ha kane ka sngi la sam iaki syrnod sha ki samla pule kiba la pyndep iaka jingpule ka jongki ha u snem 2020 bad 2021 ha ka B.Sc (Nursing), P.B. BSc (Nursing) bad GNM program, ha kaba ka Myntri ka Koit ka Khiah ka Dr. Mazel Ampareen Lyngdoh kala long kum ka kongsan bad u Prof. N. Saha, Dean jongka skulbah North-Eastern Hill University kum u symbud kongsan.
U Managing Director of Woodland Institute of Nursing u Dr. Werlock Kharshiing, ula pynpaw iaka jingsngew sarongha kaban sakhi ia kane ka sngi kaba khraw jong ka institute.
Ula kren ia ka jinglong kongsan jong kane ka jingpynkup burom ia ki samla pule halor ka jingtrei shitom ka jongki ban pyndep ia ka jingpule ka jongki naka WIN.
Kila don baroh 116 ngut ki samla pule kiba la pyndep iakaj ingpule na ka WIN, ia ki jingpule ha ki nursing program ki bapher kiba kynthup ia ki 35 ngut kiba la pyndep iaka B.Sc Nursing, 54 ngut ha ka Post Basic B.Sc haka Nursing Certificates bad 27 ngut kiba la pyndep iaka General Nursing and Midwifery (GNM).
Kane ka Convocation ka long ruh kum ka rynsan ban ithuh iaka jingtrei met bad mynsiem bad kaj ingiai shah jong ki samla pule bad ka pyni ruh iaka jingtrei borbah jong ka Woodland Institute of Nursing ha kaban ai iaka jinghikai kaba paka bad ban sei ia ka lawei jongki nongai jingsumar ha ka thaiñ.
Kane ka jingialang kala kut da ka jingkmen ha ba ki samla pule ryngkat bad la ki bahaiing bahasem kila ialehkmen haba kila ioh ban kheit ia u soh jongka jingjop.
