Shillong, Jymang 25: Ka Khasi Hills Autonomous District Council (KHADC) kan sa phah da ka jingthoh sha ka Tnad Transport ka Sorkar Jylla, kaba kyntu ha ka ban khein iap noh ia ki permit kamai jong ki taxi ki bar Jylla kiba pynkhein ia ki ain jong ka Council.
Ia kane la pyntip da u Chief Executive Member (CEM) ka KHADC Bah Titosstarwell Chyne haba iakren bad ka Shlem lyngba ka phone hynne ka janmiet sngi Palei.
Lah ban kdew hangne, ka KHADC hynne ka sngi Palei, kala sdang ia ka jingkhynra Trading Licence ba –ar sngi kynthih ia ki taxi kamai jong ki bar jylla ha Nongbah Shillong halor ka jingujor ba bun ki bar Jylla kila iaid kamai khlem ka Trading Licence bad khlem da siew ia ka Professional Tax sha ka Council, kaba la ktah ia ka kamai jakpoh jong ki nongniah kali kamai kiba dei ki trai riewlum ka Jylla.
Ka jingkhynra kala sdang naduh ka por 11 baje mynstep bad ki jaka bala pynlong ia ka jingkhynra ki kynthup naduh ka Mawprem Taxi Stand, Motphran, MUDA Parking Lot, Luckier Road, Laitumkhrah, Dhankheti, Malki, Barik, Polo, Golflink, Nongmensong, Nongthymmai, Rynjah, Madanrting, Happy Valley, Mawlong Hat, Khlieh Iewduh bad Jhalupara Taxi Stand.
Lah ban kdew ba dang shen, ka synjuk ki Nongniah Taxi ka East Khasi Hills, kala dawa ia ka KHADC ban pynlong ia ka jingkhynra Trading Licence namar ka jingjyllei ki bar jylla ba kamai taxi khlem ki kot ki sla, khlem ka Trading Licence, Professional Tax bad kiwei kiwei. Kane ka jingdawa kala mih ruh dang shen namar ka jingshah shoh ki nongniah taxi ha ka kynhun ki bar jylla ha Khyndai Lad.
U CEM ula pyntip ba ka jingkhynra kala iaid beit iaid ryntih ha baroh ki jaka kiba la hiar ban khynra bad kan dang iai bteng sa lashai ka sngi ha kine ki juh ki jaka.
Haba kylli, u CEM ula ong, “Ia ki Taxi kamai ki bar Jylla ki bym don ia ka Trading Licence, ka Council kan sa lum thup ia ki nombor kali, bad kan sa phah ia kane ka thup sha ka Tnad Transport. Ngin sa iatreilang bad ka Tnad Transport kaba dei ka bor ban pynduh ia ki permit kamai jong kito ki bym don Licence”.
Halor ka jingdon ki kali kamai jong ki bar jylla bala ioh bat namar ka jingbym don Trading Licence, u Bah Titos ula ong “Ia mynta hi ngam pat ioh jingkhein. Ia ki jingkhein jingdiah baroh ngin sa ioh lashai ka sngi kaba dei ka sngi khynra ba kut”.
Ia kawei pat ka jingkylli, u Bah Titos u pyntip ba ka Council kan sa pynlong ruh ia kum kane ka jingkhynra Trading Licence sha kiwei kiwei ki jaka kiba don ki taxi kamai jong ki bar jylla.
