Shillong, Jymmang 22: U Lat ka jylla u Phagu Chauhan hynne ka sngi Nyngkong, ula leit jurip iaka thain Mawkyrwat, South West Khasi Hills bad Mawphlang East Khasi Hills District kum shi bynta ban bteng iaka jingleit jurip iaki thain kyndong bad haka juh ka por ban pyniajan bad ki paidbah naka bynta ban sngewthuh iaki jingeh ba ki kynduh.
Haka jingleit jurip iaka thain Mawkyrwat, u Lat ka jylla u Phagu Chaugan ula leit ruh ban jurip iaka 100-Bedded Hospital bad ula lum jingkhein iaki jingdonkam ha kane ka jaka sumar.
Hadien kane u Lat ula leit ruh ban jurip iaka Maharam Higher Secondary School, JNV Mawkyrwat bad ula ioh ban iakren bad ki khynnah skul bad ki bor pyniaid ia kine ki skul ban sngewthuh iaki jingdonkam ha kine ki skul.
U Lat ka jylla u Phagu Chauhan ula leit ruh ban jurip iaka jingpyntreikam iaka skhim Mahatma Gandhi National Rural Employment Guarantee Act (MGNREGA) hapoh ka shnong Mawpon, Mawkyrwat bad ula thung dieng ruh bad haka juh ka por ula iakren bad ki paidbah ban sngewthuh iaki jingdonkam jongki.
Ha kane ka jingleit jurip iaka South West Khasi Hills, u Lat ula lum ka jingialang haka jingdon lang u DC, SP ka West Khasi Hills District, ki khlieh tnat sorkar jylla bad sorkar pdeng, u Syiem ka Maharam u Niandro Syiemiong, Syiem ka Langrim u Nongtei Syiemiong bad u Syiem ka Mawiong u Nobestar Syiem, Secretary, Village Employment Council, Mawkyrwat u M Turnia.
Haba wanphai na Mawkyrwat, u Lat ka jylla u Phagu Chauhan ula leit ruh ban jurip iaka khlaw kyntang lane ka Sacred Grove kaba don ha Mawphlang, East Khasi Hills bad iaka projek Greater Shillong Water Supply bad ka Dam haka jingdon lang u Commissioner and Secretary, Dr B D R Tiwari (IAS), Syed Md. A. Razi, IRTS, Commissioner and Secretary, ki ophisar ka PHE PHE, Smti B Lyndem.
