Guwahati, Jymmang 14 : Ka North East Congress Coordination Committee (NECCC) kala pynpaw ba u Myntri Rangbah Duh ka Ri Narendra Modi bad u Myntri kam Pohiing Amit Shah, kila dei ban pynleit jingmut noh ban tei ia ka jingsuk ha Manipur hadien ba ka BJP kala shah rem ha ka elekshon ha Karnataka.
Ka NECCC ka ong ba hadien ka jingshah rem ha ka elekshon MLA ha Karnataka, u PM bad HM ki dei ban bud ia ka “Raj Dharma” bad pynleit jingmut noh ha ka jingwanrah pat ia ka jingsuk ha Manipur da kaba pynkylla noh ia baroh ki kam ba ka BJP kala leh ha ki snem bala leit noh.
U General Secretary ka NECCC Diganta Chaudhury ula ong ba ka rai u paidbah ha Karkhana kala pynpaw ba ki paidbah ki Jylla ka thain Shathie ka Ri kila jied ia ka sainpyrthei ba da ka jingieid ha ka jaka ka jingiashun bad kila vote ia ka jingia im suk imsain bad ka jingroi ha ka ioh ka kot.
“Ka Congress kala mih ban iakhun ia kane ka elekshon halor ki ishu kiba ktah ia ki riew paidbah kata ka jingbym iohkam iohjam, ka kam bamsap, ka jingkiew dur ki mar bam, katba ka Sorkar BJP ka shaniah ha ka bor jong ka pisa bad ka jingkyn shoit iapher jaidbynriew” ong u Chaudhury.
Ka NECC ka phah ia ka jingkhublei sha ki nongthep vote ka Karnataka halor ka jingrai pynrem ia ka politics ka BJP bala ialam ym da mano mano ruh lait na u Myntri Rangbah ka Ri India.
