Jowai, Jymmang 12: Ka Rangdajied United kala sdang da ka jingjop ha ka jingiakhun iaka Meghalaya State League (MSL) 2023 da kaba pynliem da 2-0 ia ka Niaw Wasa United ha ka jingsdang jong ka MSL hynne ka sngi ha Kiang Nangbah Stadium, Jowai.
U Wanlamsuk Nongkhlaw ula thep ia ka kol kaba nyngkong ha ka minit kaba 34 jong ka kylla step katba u Damehun Syih ula thep ia ka kol ka baar ha ka minit kaba 60 ban pynthikna ba ka Rangdajied kan jop suk ia ka Niaw Wasa United ha ka Group B jong ka MSL.
Ka Rangdajied kaba la wan Baar ha MSL 2019 kala ialehkai bha naduh ka kylla step haduh ban da kut ka jingialehkai pyrshah iaka lahduh jong ka MSL ha u 2017-19 ka Niaw Wasa watla ki paidbah kila wan ban ai jingkyrshan pura ia kane ka kynhun kaba na rilum Jaintia, hynrei ki rangkynsai jong ka Rangdajiedkim shym la ailad ai ka Niaw Wasa ban ioh thep kol.
U Myntri ka tnad Sports & Youth Affairs u Bah Shakliar Warjri ula plie pyrda ia kane ka lympung ialehkai Football kum u Kongsan ha ryngkat ka jingdonlang u MLA ka Jowai u Bah Wailadmiki Shylla kum u Symbud Kongsan.
Haba ai jingkren shwa ban sdang ka jingialehkai u Bah Shylla ula ong, ba ki kam ialehkai kin ym lah ban iaid shakhmat khlem ka jingdon jong ki nongpeitkai bad ula kyntu ia baroh ba kin mih shakhmatban ai jingkyrshan iaka kynhun ka jongki la ki rem ne ki jop iaka jingiakhun, khamtam eh ia ki nongkyrshan ia ki kynhun ialehkai football kiba na rilum Jaintia.
U MLA ula pyntip ruh ba ka sorkar jylla kan sa pynbha shuh shuh ia kane ka madan ialehkai.
U Bah Shakliar Warjri ula khmih lynti ba shen yn sa sdang noh ia ka kam khamtam haba iaka Detailed Project Report la sdang ban pynkhreh bad ula pynpaw iaka jingkmen ban iohi ba ka rukom ialehkai football ki nongialehkai haka jylla kala kiew bha.
Ka RUFC kala pyni iaka jingkhlain ka jongka naduh ba sdang haba u Tremiki Lamurong ula shut ia ka bol hynrei la ioh ban kah noh ia katei ka bold a u nongap bak.
Ha ka minit kaba 18 ka RUFC kala ioh iaka penalty hynrei u Lamurong uba la leit ban shut ia ka penalty ym shim la lah ban thep sha kol bad ka Niaw Wasa kala ioh mynsiem da katei ka jinglait sharud.
Watla kane ka jingiakhun kala kut ha ka por 5 baje janmiet, hynrei kila don kiwei pat ki jingpynbyrngia khamtam ka Fan Zone kaba don iaka jingrwai kaba la rwai da ka Jessie Lyngdoh, kaba la thaw bad pynwandur iaka anthem jongka MSL 2023 bad nalor kane la don ruh ki dukan die bam.
